واشنگٹن/اسلام آباد (ویب ڈیسک): وائٹ ہاؤس نے ایران کے ساتھ جاری حالیہ مذاکرات میں پاکستان کے بطور واحد ثالث (Sole Mediator) کردار کو سراہتے ہوئے پاکستانی قیادت کی سفارتی کوششوں کو “ناقابل یقین” قرار دیا ہے۔
وائٹ ہاؤس کے ترجمان نے میڈیا سے گفتگو کرتے ہوئے تصدیق کی ہے کہ ایران کے ساتھ مختلف امور پر رابطہ جاری ہے اور اب تک کی بات چیت نتیجہ خیز رہی ہے۔ ترجمان نے امید ظاہر کی کہ مذاکرات کا اگلا دور بھی اسی مقام پر ہوگا جہاں پہلے ہوا تھا، جس کے بعد اب اسلام آباد کو مذاکرات کے اگلے مرحلے کے لیے ممکنہ میزبان قرار دیا جا رہا ہے۔
ترجمان وائٹ ہاؤس نے ان خبروں کی تردید کی ہے جن میں ایران کے ساتھ جنگ بندی معاہدے میں توسیع کا دعویٰ کیا گیا تھا۔ انہوں نے واضح کیا کہ فی الحال ایسی خبریں درست نہیں ہیں، تاہم سفارتی چینلز کے ذریعے پیش رفت جاری ہے۔
عالمی مبصرین کے مطابق، امریکا اور ایران کے درمیان کشیدگی کم کرنے کے لیے پاکستان کی ثالثی خطے کے امن کے لیے انتہائی اہمیت کی حامل ہے۔ وائٹ ہاؤس کا پاکستانی کوششوں کا اعتراف دونوں ممالک کے درمیان بہتر ہوتے ہوئے سفارتی تعلقات کا مظہر ہے۔