نیویارک (ویب ڈیسک): پاکستانی نژاد امریکی کمیونٹی کی نمائندہ تنظیم ‘امریکن پاکستانی پبلک افیئرز کمیٹی’ (APPAC) کی جانب سے نیویارک میں ایک پروقار افطار ڈنر کا اہتمام کیا گیا، جس میں کمیونٹی کے رہنماؤں اور ارکان کی بڑی تعداد نے شرکت کی۔
ریاست نیویارک کی گورنر کیتھی ہوچل نے تقریب میں بطورِ خاص شرکت کی اور پاکستانی و مسلم امریکی کمیونٹی کو رمضان المبارک کی مبارکباد پیش کی۔ اپنے خطاب میں گورنر ہوچل نے مسلم امریکیوں کی خدمات کا اعتراف کرتے ہوئے یقین دلایا کہ
ریاست نیویارک تمام شہریوں کے حقوق کا تحفظ یقینی بنائے گی۔
اہم شعبوں میں مسلم کمیونٹی کو ترقی کے یکساں مواقع فراہم کیے جائیں گے۔
اس تقریب کے انعقاد میں ڈاکٹر اعجاز احمد، ناہید بھٹی، اسد چوہدری اور مرزا خاور بیگ نے کلیدی کردار ادا کیا۔ ‘ایپک’ کے رہنماؤں نے گورنر کا استقبال کرتے ہوئے کہا کہ ان کی تنظیم پاکستانی کمیونٹی کو امریکہ کے جمہوری اور سیاسی عمل میں متحرک کرنے کے لیے مسلسل کوشاں ہے۔
انہوں نے اس امید کا اظہار کیا کہ منتخب حکام کمیونٹی کے قابل افراد کو اہم عوامی عہدوں پر خدمات انجام دینے کے مزید مواقع فراہم کریں گے۔
پروگرام کے دوسرے حصے میں معروف مذہبی اسکالر مفتی محمد فرحان نے رمضان المبارک کی برکات پر روشنی ڈالی۔ انہوں نے شرکاء پر زور دیا کہ وہ روزے اور عبادت کی حقیقی روح کو صرف رمضان تک محدود نہ رکھیں بلکہ پورا سال اپنی زندگیوں کا حصہ بنائیں۔