نیویارک:(ویب ڈیسک) پاکستان نے اقوامِ متحدہ کی سلامتی کونسل (UNSC) میں مقبوضہ جموں و کشمیر اور فلسطین میں بچوں کے خلاف ہونے والے انسانی حقوق کے سنگین مظالم پر عالمی برادری کی توجہ مبذول کراتے ہوئے “انتخابی خاموشی” (Selective Omissions) پر سخت احتجاج کیا ہے۔
اقوامِ متحدہ میں پاکستان کے فرسٹ سیکرٹری ذوالفقار علی نے ‘ریڈ ہینڈ ڈے 2026’ کے موقع پر پاناما مشن کے زیرِ اہتمام ہونے والے اجلاس میں قومی بیان جاری کیا۔
فلسطینی بچوں کی حالتِ زار: بیان میں کہا گیا کہ غزہ اور مغربی کنارے سمیت مقبوضہ فلسطینی علاقوں میں بے شمار بچے شہید ہو چکے ہیں یا زندگی بھر کے لیے ذہنی و جسمانی زخموں کا شکار ہیں۔
کشمیر کی “خاموش” رپورٹنگ: پاکستان نے افسوس کا اظہار کیا کہ ماضی میں اقوامِ متحدہ کی رپورٹس میں مقبوضہ جموں و کشمیر کے بچوں کا تذکرہ ہوتا تھا، لیکن 5 اگست 2019 کے غیر قانونی بھارتی اقدامات کے بعد وہاں حالات مزید خراب ہونے کے باوجود ان کا تذکرہ نکال دیا گیا ہے۔
پاکستان کا مطالبہ: پاکستان نے خبردار کیا کہ مخصوص علاقوں کے بچوں کو نظر انداز کرنا غیر ملکی قبضے میں رہنے والے بچوں پر ہونے والے مظالم کی اصل شدت کو چھپانے کے مترادف ہے۔
ذوالفقار علی نے زور دیا کہ مسلح تنازعات میں بچوں کی بھرتی روکنے اور انہیں محفوظ تعلیم کی فراہمی کے لیے عالمی سطح پر بلا تفریق اقدامات ناگزیر ہیں۔
