نیو جرسی (ویب ڈیسک) نیو جرسی کی گورنر مائیکی شیرل نے وفاقی امیگریشن حکام (ICE) کی جانب سے جاری بلاجواز کریک ڈاؤن کو روکنے کے لیے ایک نیا ایگزیکٹو آرڈر نمبر 12 جاری کر دیا ہے۔
بدھ کے روز دستخط کیے گئے اس حکم نامے کے تحت اب کوئی بھی آئی سی ای ایجنٹ جوڈیشل وارنٹ (عدالتی حکم نامے) کے بغیر ریاستی املاک پر امیگریشن سے متعلق کوئی کارروائی نہیں کر سکے گا۔
گورنر شیرل نے سوشل میڈیا پر اپنے ایک بیان میں کہا، “میں نے بحریہ (Navy) میں رہتے ہوئے پوری دنیا میں خدمات انجام دی ہیں اور میں نے دیکھا ہے کہ بے لگام ملیشیا کس طرح خوف و ہراس پھیلاتی ہے۔ میں نیو جرسی میں ایسا ہرگز نہیں ہونے دوں گی۔”
اس نئے قانون کے تحت، آئی سی ای ایجنٹس کو رہائشی طبی مراکز، بچوں کی دیکھ بھال کے مراکز (Child Care Centers)، سرکاری دفاتر اور ریاستی یونیورسٹیوں کے ہاسٹلز میں داخلے کے لیے عدالتی وارنٹ دکھانا لازمی ہوگا۔
مزید برآں، ریاست کی جانب سے ایک نئی ویب سائٹ بھی لانچ کی جا رہی ہے جہاں شہری آئی سی ای کے ساتھ ہونے والے اپنے تجربات اور کسی بھی غیر قانونی کارروائی کی اطلاع دے سکیں گے۔
اس ویب سائٹ کا مقصد آئی سی ای کی جانب سے طاقت کے بے جا استعمال، بلا وارنٹ تلاشی یا گرفتاری، نسلی امتیاز اور شہریوں کے حقوق کی خلاف ورزیوں پر نظر رکھنا ہے۔
اٹارنی جنرل کا دفتر اس ڈیٹا کو قانونی چارہ جوئی اور شہریوں کے تحفظ کی حکمت عملی تیار کرنے کے لیے استعمال کرے گا۔ گورنر نے مزید کہا کہ ٹرمپ انتظامیہ کی جانب سے آئین کی خلاف ورزی اور معصوم شہریوں کی زندگیوں کو خطرے میں ڈالنے کے اقدامات کو نیو جرسی میں برداشت نہیں کیا جائے گا۔
