نیویارک: بروکلین میں جمعہ کی علی الصبح ایک رہائشی عمارت میں لگی ہولناک آگ نے 81 سالہ بزرگ خاتون کی جان لے لی، جبکہ پانچ دیگر افراد زخمی ہو گئے۔ محکمہ فائر سروس (FDNY) کے مطابق یہ واقعہ ونپھراپ اسٹریٹ (Winthrop Street) پر واقع چھ منزلہ عمارت میں پیش آیا۔
فائر حکام کے مطابق آگ رات ایک بجے سے ٹھیک پہلے عمارت کی چوتھی منزل پر لگی۔ دیکھتے ہی دیکھتے دھواں پوری عمارت میں پھیل گیا۔
ایک رہائشی نے میڈیا کو بتایا کہ “صرف 10 منٹ کے اندر صورتحال اتنی سنگین ہو گئی کہ جب میں نے اپنا دروازہ کھولا تو دھوئیں کی وجہ سے باہر کچھ نظر نہیں آ رہا تھا۔”
فائر فائٹرز نے ایک گھنٹے سے بھی کم وقت میں آگ پر قابو پا لیا۔ امدادی ٹیموں نے ہر منزل پر جا کر لوگوں کو آگ بجھنے کی اطلاع دی تاکہ وہ گھبراہٹ میں عمارت سے باہر نہ نکلیں۔
اس واقعے میں ایک 81 سالہ خاتون جان کی بازی ہار گئیں، جن کی شناخت ابھی ظاہر نہیں کی گئی۔پانچ دیگر افراد کو معمولی چوٹیں آئیں جنہیں طبی امداد فراہم کر دی گئی ہے۔
فائر مارشل کی جانب سے آگ لگنے کی وجوہات کا پتہ لگانے کے لیے تحقیقات جاری ہیں۔
بروکلین میں پچھلے دو دنوں کے دوران آتشزدگی سے ہلاکت کا یہ دوسرا واقعہ ہے۔ اس سے قبل جمعرات کو اوشن ایونیو (Ocean Avenue) پر لگی آگ میں بھی ایک شخص ہلاک ہو گیا تھا۔
