ہوسٹن: کراچی کے مصروف تجارتی مرکز گُل پلازہ میں پیش آنے والے المناک آتشزدگی کے واقعے کو یاد رکھتے ہوئے، پاکستانی امریکن کمیونٹی آرگنائزیشن لانگ آئی لینڈ (PACOLI) کے زیرِ اہتمام نیویارک میں ایک تعزیتی اور دعائیہ اجتماع منعقد کیا جا رہا ہے۔
یہ تقریب بدھ 28 جنوری 2026 کو شام 6:30 بجے سن شائن ریسٹورنٹ، ہکس وِل، نیویارک میں ہوگی، جہاں گُل پلازہ آتشزدگی میں جاں بحق ہونے والے افراد کے لیے خصوصی دعا، اظہارِ یکجہتی اور متاثرہ خاندانوں سے تعزیت کی جائے گی۔
PACOLI کے مطابق اس سانحے نے نہ صرف قیمتی انسانی جانوں کو ہم سے جدا کیا بلکہ بے شمار خاندانوں کو گہرے صدمے سے دوچار کر دیا۔ تنظیم نے اعلان کیا ہے کہ تقریب کا مقصد شہداء کی یاد کو زندہ رکھنا، لواحقین کے ساتھ یکجہتی کا اظہار کرنا اور اجتماعی دعا کے ذریعے مرحومین کے درجات کی بلندی کی دعا کرنا ہے۔
تقریب میں کمیونٹی رہنماؤں، سماجی کارکنان اور عوام کی بڑی تعداد کی شرکت متوقع ہے۔ منتظمین نے تمام پاکستانی اور کشمیری کمیونٹی سے اپیل کی ہے کہ وہ اس دعائیہ اجتماع میں شرکت کر کے غمزدہ خاندانوں کے ساتھ کھڑے ہونے کا ثبوت دیں۔
