میشیگن میں مڈٹرم الیکشن کی مہم: ڈونلڈ ٹرمپ کی رَیپراسٹار نکی مناج (Nicki Minaj) کے ہمراہ انٹری

پورٹ ہورون / میشیگن (ویب ڈیسک): امریکی ریاست میشیگن میں 2026 کے وسط مدتی (Midterm) انتخابات کے سلسلے میں پورٹ ہورون (Port Huron) کے مقام پر منعقدہ ایک بڑے عوامی اجتماع کے دوران امریکی صدر ڈونلڈ ٹرمپ کے ساتھ مشہور بین الاقوامی ریپر نکی مناج (Nicki Minaj) کی اچانک اور غیر متوقع انٹری نے میڈیا اور انتخابی فضا میں زبردست ہلچل مچا دی ہے۔

ریپبلکن سینیٹ امیدوار مائیک روجرز (Mike Rogers) کی حمایت میں منعقدہ اس ریلی میں نکی مناج نے صدر ٹرمپ کے ساتھ ایئر فورس ون سے اتر کر شرکت کی اور اسٹیج پر مختصر خطاب کرتے ہوئے ڈونلڈ ٹرمپ کی قیادت اور ریپبلکن منشور کی باضابطہ حمایت کا اعلان کیا۔

اپنے خطاب کے دوران ڈونلڈ ٹرمپ نے ماضی میں اوہائیو کے سینیٹر جان ہسٹڈ (Jon Husted) کی جسمانی ساخت اور کھلاڑی ہونے کی تعریف پر میڈیا کی جانب سے کی جانے والی تنقید پر گفتگو کرتے ہوئے اسے “فیک نیوز” قرار دیا اور کہا کہ ان کی گفتگو مزاحیہ انداز میں تھی۔ اس کے بعد انہوں نے اسٹیج پر موجود نکی مناج کی تعریف کی اور انہیں “عظیم اور ذہین شخصیت” قرار دیا۔

نکی مناج نے مجمع سے خطاب میں کہا کہ ڈونلڈ ٹرمپ نے قوم میں امید جگائی ہے اور وہ بچوں کے مستقبل اور خاندانی اقدار کے تحفظ کے لیے ان کا ساتھ دے رہی ہیں۔

ریلی میں ٹرمپ نے کینیڈا کے ساتھ جاری تجارتی کشیدگی اور ٹیرف پالیسی پر بھی گفتگو کی اور دعویٰ کیا کہ کینیڈا کے ساتھ تنازع کا تصفیہ جلد امریکہ کے حق میں طے پا جائے گا۔