نیویارک میں ہالووین ویک اینڈ کی دھوم: سڑکوں پر گہما گہمی، ‘ٹرک اور اسٹریٹس’ اور تاریخی پریڈ کی تیاریاں مکمل

نیویارک (ویب ڈیسک): نیویارک شہر میں ہالووین ویک اینڈ (Halloween Weekend) کا باقاعدہ آغاز ہو چکا ہے، جس کے ساتھ ہی پورے شہر میں رنگ برنگے کاسٹیومز (Costumes)، کینڈی اور جشن کا ماحول دیکھنے کو مل رہا ہے۔ شہر بھر کے شہری اور بچے اس خوفناک مگر پرمسرت تہوار کو منانے کے لیے کاف عرصے سے پرجوش تھے۔

ہالووین ویک اینڈ سے قبل شہر میں کتوں کی روایتی ‘ڈاگ پریڈ’ (Halloween Dog Parade) سمیت متعدد پیشگی تقریبات انعقاد پذیر ہو چکی ہیں

۔ جمعے کے روز اسکول کھلے رہے جہاں بچوں کے لیے مختلف ہالووین محفلیں سجائی گئیں۔ اس کے علاوہ، محکمہ ٹرانسپورٹیشن (Department of Transportation) کے زیر اہتمام شہر کی پانچوں بورو (Five Boroughs) میں ‘ٹرک اور اسٹریٹس’ (Trick-or-Streets) کا انعقاد کیا گیا، جس کے تحت 180 سے زائد مقامات کو گاڑیوں کی آمدورفت سے پاک ‘کار فری اوپن اسٹریٹس’ (Car-free Open Streets) میں تبدیل کر دیا گیا۔

اس اقدام کا مقصد بچوں کو محفوظ ماحول میں پیدل چلنے اور ‘ٹرک اور ٹریٹنگ’ (Trick-or-Treating) کی سہولت فراہم کرنا ہے۔ محکمہ ٹرانسپورٹ کی ویب سائٹ پر اس حوالے سے ایک تفصیلی نقشہ بھی جاری کیا گیا ہے جہاں لائیو پرفارمنسز، تفریحی سرگرمیاں اور فنکارانہ پروگرامز منعقد کیے جا رہے ہیں۔

ہالووین کی سب سے بڑی کشش گرین وچ ولیج (Greenwich Village) میں منعقد ہونے والی دنیا کی سب سے بڑی ہالووین پریڈ (Village Halloween Parade) ہے۔

ہفتے کی رات منعقد ہونے والی اس تاریخی پریڈ کے لیے شہریوں نے اپنے کاسٹیومز کو حتمی شکل دے دی ہے۔ اس سال پریڈ کا مرکزی تھیم ‘باڈی اینڈ سول’ (Body and Soul) رکھا گیا ہے، جس کا مقصد روح، تحریک اور تخیل کے آپسی تعلق کا جشن منانا ہے۔ پریڈ میں مشہور ڈانس گروپ ‘تھریلر این وائی سی’ (Thriller N-Y-C) بھی اپنی بہترین پرفارمنس پیش کرے گا۔

موسم کی بہترین صورتحال اور جگہ جگہ جاری سرگرمیوں کے ساتھ نیویارک شہر میں ہالووین کا جوش و خروش عروج پر ہے۔ ایک حالیہ رپورٹ کے مطابق ‘والٹ ہب’ (WalletHub) نے نیویارک سٹی کو ہالووین منانے کے لیے امریکہ کا بہترین شہر قرار دیا ہے۔