تاریخ:15 اکتوبر 2026
نیویارک ویب ڈیسک: اقوامِ متحدہ میں پاکستان کے قائم مقام مستقل مندوب سفیر عثمان جدون (Ambassador Usman Jadoon) نے اقوامِ متحدہ کی سلامتی کونسل (UN Security Council) کے مشرقِ وسطیٰ کی صورتحال پر منعقدہ عام مباحثے میں قومی بیانیہ پیش کرتے ہوئے واضح کیا ہے کہ جب تک اسرائیلی غصب و تسلط قائم ہے اور فلسطینی عوام کے حقِ خودارادیت کو تسلیم نہیں کیا جاتا، مشرقِ وسطیٰ میں پائیدار امن ایک خواب ہی رہے گا۔
پاکستان کے سینیئر سفارت کار نے اپنے خطاب میں فلسطین، یمن، لبنان اور سوریا کی صورتحال پر تفصیل سے روشنی ڈالی اور عالمی برادری پر زور دیا کہ وہ اقوامِ متحدہ کی قراردادوں اور عالمی قوانین پر مکمل عملدرآمد یقینی بنائے۔
دو ریاستی حل اور فلسطینی ریاست: سفیر عثمان جدون نے زور دیا کہ دو ریاستی حل (Two-State Solution) ہی مشرقِ وسطیٰ میں پائیدار امن کی واحد اور بین الاقوامی طور پر تسلیم شدہ بنیاد ہے۔
پاکستان پیشگی 1967ء کی سرحدوں پر مبنی ایک آزاد، خودمختار اور متصل فلسطینی ریاست کے قیام کا مطالبہ کرتا ہے جس کا دارالحکومت القدس الشریف ہو۔
اسرائیلی اقدامات کی شدید مذمت: پاکستان نے مقبوضہ مغربی کنارے اور مشرقی یروشلم میں اسرائیلی بستیوں کی غیر قانونی توسیع (خصوصاً E1 منصوبہ)، مساجد بالخصوص مسجدِ اقصیٰ / الحرم الشریف میں اشتعال انگیز اور غیر قانونی مداخلت، اور غیر قانونی آبادکاروں کے تشدد کی سخت ترین الفاظ میں مذمت کی اور تاریخی و قانونی صورتحال (Status Quo) کا احترام برقرار رکھنے کا مطالبہ کیا۔
غزہ میں فائر بندی کی مسلسل خلاف ورزیوں، شہریوں کے قتل عام اور انسانی امداد کی فراہمی پر پابندیوں پر گہری تشویش کا اظہار کرتے ہوئے انہوں نے بلا تعطل اور بڑے پیمانے پر امداد کی فراہمی، بحالی کے کاموں کا آغاز اور انروا (UNRWA) کے کلیدی کردار کی سرپرستی کی اپیل کی، نیز غزہ اور مغربی کنارے کی تقسیم یا جبری منتقلی کو یکسر مسترد کر دیا۔
پاکستان نے یمن کی ابتر صورتحال پر تشویش کا اظہار کرتے ہوئے حوثی باغیوں کی جانب سے برادر ملک سعودی عرب کی شہری و معاشی تنصیبات پر حملوں کی شدید مذمت کی اور سعودی عرب کی سلامتی، خودمختاری اور بین الاقوامی قانون کے تحت حقِ دفاع کے لیے غیر متزلزل حمایت کا اعادہ کیا۔
پاکستان نے یمن میں اقوام متحدہ کے خصوصی نمائندے کی پرامن کوششوں کی بھی حمایت کی۔
پاکستان نے لبنان میں اقوام متحدہ کی قرارداد 1701 پر مکمل عملدرآمد اور اسرائیلی انخلاء کا مطالبہ کیا، جبکہ شام میں داخلی استحکام اور ملک کو مثبت سمت میں گامزن کرنے کے لیے شامی حکومت کی جاری کوششوں کا خیرمقدم کیا۔