نیویارک (ویب ڈیسک): نیویارک سٹی کے معمول کے مطابق پرامن علاقے اپر ویسٹ سائیڈ میں جمعے کی صبح ایک شخص کی جانب سے چاقو کے وار کر کے دو شہریوں کو شدید زخمی کرنے کے واقعے کے بعد شہری اور ریاستی حکام نے جائے وقوعہ کا جائزہ لے کر ہنگامی تحقیقات کا آغاز کر دیا ہے۔
پولیس کے مطابق راؤل مورالس (Raul Morales) نامی 51 سالہ ملزم نے چند بلاکس کے فاصلے پر دو نامعلوم افراد کو نشانہ بنایا:
پہلا حملہ ویسٹ 84تھ اسٹریٹ اور سینٹرل پارک ویسٹ پر ہوا جہاں ملزم نے ایک 57 سالہ ایشیائی نژاد شہری کی پیٹھ میں چاقو مارا۔
دوسرا حملہ ویسٹ 86تھ اسٹریٹ اور ایمسٹرڈیم ایونیو کے قریب ایک عبادت گاہ (Synagogue) کے بالکل کونے پر ہوا، جہاں ملزم نے ایک 50 سالہ یہودی شہری کے سینے میں پیچ کس (Screwdriver) گھونپ دیا۔
عینی شاہدین کے مطابق ملزم حملوں کے دوران نعرے بازی کر رہا تھا۔ حملوں کے بعد ملزم فرار ہو گیا اور ویسٹ 89تھ اور ایمسٹرڈیم ایونیو میں واقع ایک اپارٹمنٹ میں خود کو بند کر لیا، جہاں بعد میں نیویارک پولیس (NYPD) نے اسے حراست میں لے لیا۔
پولیس نے دونوں مقامات سے آلاتِ قتل برآمد کر لیے ہیں۔ اگرچہ 51 سالہ ملزم کی ذہنی بیماری کی سابقہ ہسٹری موجود نہیں ہے، لیکن ابتدائی تحقیقات سے اندازہ ہوتا ہے کہ ذہنی صحت کے مسائل اس واقعے کا سبب ہو سکتے ہیں۔
این وائی پی ڈی کی جانب سے اس بات کی بھی تفتیش کی جا رہی ہے کہ آیا اس حملے کا مقصد اینٹی سیمیٹک (یہودی مخالف) یا نسل پرستی پر مبنی تھا۔ ملزم کے خلاف چارجز عائد کرنے کا عمل جاری ہے۔