نیویارک: اقوامِ متحدہ کے مغربی صحارا میں قائم امن مشن ‘منورسو’ (MINURSO) کے نو منتخب فورس کمانڈر میجر جنرل جواد قاضی نے نیویارک میں پاکستانی سفارت خانے (Chancery) میں اقوامِ متحدہ میں پاکستان کے مستقل مندوب اور نامزد فارن سیکرٹری سفیر عاصم افتخار احمد سے ملاقات کی۔
ملاقات کے دوران سفیر عاصم افتخار احمد نے میجر جنرل جواد قاضی کو اہم بین الاقوامی امن مشن کا فورس کمانڈر مقرر ہونے اور عالمی سطح پر پاکستان کی نمائندگی کا اعزاز حاصل کرنے پر دلی مبارکباد پیش کی۔ اس موقع پر میجر جنرل جواد قاضی نے سفیر عاصم افتخار کو پاکستان کے نئے فارن سیکرٹری کی ذمہ داریاں سنبھالنے پر نیک تمناؤں کا پیغام پہنچایا۔
امن مشنز کی جدید ضروریات: ملاقات کے دوران اقوامِ متحدہ کے پیس کیپنگ آپریشنز (UN Peacekeeping Operations) کے مستقبل، بدلتے ہوئے عالمی و آپریشنل ماحول اور اس کے تقاضوں سے ہم آہنگی پر تفصیلی تبادلہ خیال کیا گیا۔
دونوں رہنماؤں نے امن مشنز کے مینڈیٹ پر عملدرآمد کے لیے درپیش پیچیدہ سیاسی اور عسکری حکمتِ عملیوں کے مختلف پہلوؤں پر بھی غور کیا۔
پاکستان دنیا بھر میں اقوامِ متحدہ کے امن مشنز میں سب سے زیادہ دستے بھیجنے والے ممالک میں شامل ہے، اور میجر جنرل جواد قاضی کی یہ تقرری بین الاقوامی سطح پر پاکستان کی پیش Police و عسکری صلاحیتوں کا اعتراف ہے۔