ورلڈکپ فائنل کی ٹکٹیں آسمان سےباتیں کرنے لگیں

نیویارک: فیفا ورلڈ کپ کا فائنل اب بالکل قریب ہے، لیکن اسٹیڈیم جا کر میچ دیکھنے کا خرچ اب عام فٹ بال شائقین کے لیے ایک ادھورا خواب بن چکا ہے۔

ٹورنامنٹ کا فائنل اتوار کے روز ایسٹ ردرفورڈ میں واقع میٹ لائف اسٹیڈیم (MetLife Stadium) میں کھیلا جائے گا، جسے ٹورنامنٹ کے لیے عارضی طور پر نیویارک نیوجرسی اسٹیڈیم (NYNJ Stadium) کا نام دیا گیا ہے۔ اگرچہ لاکھوں شائقین نے اس تاریخی لمحے کا گواہ بننے کا خواب دیکھا تھا، لیکن ری سیل مارکیٹ کی ہوش رُبا قیمتوں نے اسے ایک لگژری بنا دیا ہے جو صرف امیر ترین افراد ہی افورڈ کر سکتے ہیں۔

جو شائقین بلیک یا ری سیل مارکیٹ سے ٹکٹ خریدنے کے لیے تیار ہیں، ان کے لیے فائنل کی دستیاب سب سے سستی ٹکٹ بھی 7,733 امریکی ڈالر (ٹیکس اور فیسز کے بغیر) سے زائد کی لسٹ کی گئی ہے۔

اسٹیڈیم کی بہترین نشستوں (Seats) کی قیمتیں تو اور بھی زیادہ حیران کن ہیں

اسٹب ہب (StubHub): اس پلیٹ فارم پر سیکشن 139، رو 17 میں دو ٹکٹیں دستیاب ہیں جن میں سے ہر ایک کی قیمت 45,322 ڈالر ہے۔ یعنی دونوں ٹکٹوں کی مجموعی قیمت 90,000 ڈالر سے زیادہ بنتی ہے، جو کہ نیویارک اسٹیٹ کے کئی علاقوں میں ایک پورا گھر خریدنے کے لیے ڈاؤن پیمنٹ (Down Payment) کے برابر ہے۔

ٹکٹ ماسٹر (Ticketmaster): یہاں ایک ری سیلر نے رو 7 کی دو نشستیں فیسز کے بغیر 89,964 ڈالر میں پیش کی ہیں۔

سیٹ پک (SeatPick): اس ویب سائٹ پر اب تک کی سب سے مہنگی لسٹنگ دیکھی گئی ہے، جہاں ایک ری سیلر تمام فیسز شامل کر کے ایک اکیلی ٹکٹ 200,847 امریکی ڈالر میں فروخت کر رہا ہے۔

ان قیمتوں سے یہ واضح ہو چکا ہے کہ ہوم گراؤنڈ پر ورلڈ کپ فائنل کا انعقاد ہونے کے باوجود، عام متوسط طبقے کے فٹ بال فینز اب اسٹیڈیم کے بجائے صرف ٹی وی اسکرینز پر ہی فائنل کا لُطف اٹھا سکیں گے۔