نیویارک (ویب ڈیسک): اقوامِ متحدہ کی جنرل اسمبلی کے 81 ویں اجلاس (UNGA-81) کی سیکنڈ کمیٹی سے خطاب کرتے ہوئے پاکستان کے سیکنڈ سیکرٹری محمد فہیم (Muhammad Faheem) نے واضح کیا ہے کہ فلسطینی عوام کا اپنے قدرتی وسائل پر مستقل اور کامل حق (Permanent Sovereignty) ان کے ناقابلِ تنسیخ حقِ خود ارادیت سے الگ نہیں کیا جا سکتا۔ پاکستان نے عالمی برادری پر زور دیا ہے کہ وہ اسرائیل کو اس کے غیر قانونی اقدامات، بالخصوص فلسطینی قدرتی وسائل کے استصال سے روکے۔
پاکستانی مندوب نے اپنے بیان میں کہا کہ اسرائیل پر لازم ہے کہ وہ بین الاقوامی قوانین اور اقوامِ متحدہ کی متعلقہ قرار دادوں کے تحت اپنی تمام تر عالمی ذمہ داریوں کی پاسداری کرے۔
پاکستان نے غزہ تنازع کے خاتمے اور فلسطینیوں کے حقوق کی بحالی کے لیے بین الاقوامی کوششوں کی بلا مشروط حمایت کا اعادہ کیا ہے۔
پاکستانی نمائندے محمد فہیم نے اقوامِ متحدہ کی سیکیورٹی کونسل کی قرارداد 2803 (Security Council Resolution 2803) کی مکمل، نیک نیتی اور بلا تاخیر عملدرآمد پر زور دیا۔ انہوں نے ‘غزہ تنازع کے خاتمے کے لیے جامع منصوبے’ (Comprehensive Plan to End the Gaza Conflict) کی مکمل حمایت کا اعلان کیا۔
پاکستان نے نیویارک ڈیکلریشن (New York Declaration) پر مکمل عملدرآمد کا اعادہ کرتے ہوئے کہا کہ مشرقِ وسطیٰ میں مستقل اور پائیدار امن صرف اور صرف مظلوم فلسطینی عوام کو ان کے تمام بنیادی حقوق اور آزاد ریاست کی فراہمی سے ہی ممکن ہے۔
پاکستانی وفد نے زور دیا کہ اسرائیل کی جانب سے فلسطینی سرزمین پر قدرتی وسائل کی لوٹ مار اور قبضہ عالمی قانون کی کھلی خلاف ورزی ہے جسے فوری طور پر روکا جانا چاہیے۔