نیویارک: نیویارک سٹی فائر ڈپارٹمنٹ (FDNY) کی فائر کمشنر لیلیان بونسیگنور (Lillian Bonsignore) اور فائر فائٹرز کے اعلیٰ حکام نے ای ایم ایس اکیڈمی (EMS Academy) میں ایک پروقار تقریب کے دوران نئی یادگاری دیوار (Memorial Wall) کی باضابطہ رونمائی کی ہے۔
یہ یادگاری دیوار نیویارک شہر کے شہریوں کی خدمت کے دوران اپنی جانیں قربان کرنے والے، ورلڈ ٹریڈ سینٹر کے المیے سے پیدا ہونے والی بیماریوں کی وجہ سے انتقال کر جانے والے، اور بیورو آف ٹریننگ کے دوران دورانِ ملازمت دنیا سے رخصت ہونے والے تمام ای ایم ایس اراکین کی خدمات اور ان کی عظیم قربانیوں کو خراجِ تحسین پیش کرنے کے لیے قائم کی گئی ہے۔
تقریب سے خطاب کرتے ہوئے فائر کمشنر لیلیان بونسیگنور نے کہا: “یہ یادگاری دیوار نیویارک شہر کی خدمت کرنے والے ہمارے ای ایم ایس کے ان عظیم اراکین کی مستقل یاد دہانی ہے جنہوں نے شہریوں کی حفاظت میں اپنی جانیں نچھاور کیں۔ ان کا کام ہمیشہ بنیادی اور اہم رہے گا اور ان کی خدمات اور قربانیاں ہمیشہ لائقِ تحسین اور ناقابلِ فراموش رہیں گی”۔
اس یادگاری دیوار کا خیال ایک پروبیشنری فائر فائٹر ہالی ساتو (Haley Sato) کا پیش کردہ تھا، جو اس سے قبل ای ایم ایس ڈرل انسٹرکٹر رہ چکی تھیں اور انہوں نے عالمی وبا کورونا (COVID-19) کے دور میں ای ایم ایس اکیڈمی سے اپنے کیریئر کا آغاز کیا تھا۔
ہالی ساتو اپنے چیف ڈرل انسٹرکٹر ای ایم ٹی ادریس بے کے جذبے سے شدید متاثر تھیں، جو خود کوویڈ-19 کا شکار ہو کر انتقال کر گئے تھے۔ ادریس بے کی خدمات کو ہمیشہ زندہ رکھنے کے لیے ہالی ساتو نے ‘چیلنج کوائنز’ فروخت کر کے 13,000 ڈالر سے زائد کی رقم جمع کی۔
لیڈر کمپنی 120، ای ایم ایس ڈرل انسٹرکٹرز اور بیورو آف ٹریننگ کے تعاون اور بھرپور مالی و اخلاقی مدد سے ہالی ساتو کا یہ خواب ایک پائیدار یادگار کی شکل اختیار کر گیا۔