لزبن : پرتگال کے عالمی شہرت یافتہ اسٹار فٹبالر کرسٹیانو رونالڈو انسٹاگرام پر ایک متنازع ویڈیو کو لائک (Like) کرنے کے بعد ایک بار پھر سوشل میڈیا اور فٹبال کی دنیا میں توجہ کا مرکز بن گئے ہیں۔
سوشل میڈیا صارفین اور فٹبال مداحوں کے مطابق، رونالڈو نے ایک ایسی ویڈیو کو پسند کیا جس میں عالمی فٹبال تنظیم (فیفا) پر فیفا ورلڈ کپ 2026 کے دوران ارجنٹینا کے حق میں جانبداری اور ٹیم کو فائنل تک پہنچانے میں مبینہ مدد دینے کے سنگین الزامات عائد کیے گئے تھے۔
ورلڈ کپ 2026 کے دوران بعض ریفری فیصلوں پر پہلے ہی شدید تنقید کی جا رہی تھی، جن میں مصر کے خلاف میچ میں سامنے آنے والا ایک متنازع فیصلہ بھی شامل ہے۔ رونالڈو کے اس ایک ‘لائک’ نے جاری بحث کو مزید ہوا دے دی ہے اور مداحوں کی جانب سے اسے رونالڈو کی خاموش تائید قرار دیا جا رہا ہے۔
فیفا کی جانب سے ان الزامات اور رونالڈو کے سوشل میڈیا ایکشن پر فی الوقت کوئی باضابطہ ردِعمل یا بیان جاری نہیں کیا گیا ہے، تاہم سوشل میڈیا پلیٹ فارمز پر اس حوالے سے شائقینِ فٹبال کے درمیان شدید بحث جاری ہے۔
واضح رہے کہ فیفا ورلڈ کپ 2026 کے سنسنی خیز فائنل میں اسپین نے اضافی وقت میں ارجنٹینا کو 0-1 سے شکست دے کر عالمی چیمپئن بننے کا اعزاز حاصل کیا ہے۔