نیویارک کےمیئرظہران ممدانی کی سالگرہ کا انوکھا انداز:ٹک ٹاک پروائرل ہونےوالی ڈیجیٹل اور فزیکل برتھ ڈےکارڈمہم

نیویارک (ویب ڈیسک): نیویارک سٹی کے میئر ظہران ممدانی (Zohran Kwame Mamdani) کی آنے والی 35 ویں سالگرہ کے موقع پر نیویارک کے شہریوں نے ان کے لیے ایک انوکھا اور زبردست سرپرائز تیار کیا ہے۔

سوشل میڈیا پلیٹ فارم ٹک ٹاک پر ایک خاتون کی جانب سے شروع کی جانے والی ورچوئل برتھ ڈے کارڈ کی مہم دیکھتے ہی دیکھتے وائرل ہو گئی ہے، جس میں اب تک 2 ہزار سے زائد شہروں کے 7 ہزار سے زائد افراد دستخط کر چکے ہیں۔

اس آن لائن برتھ ڈے کارڈ کی خاص بات یہ ہے کہ اس پر دستخط کرنے والے شہری سالگرہ کے تحفے کے طور پر کوئی اچھی نیت یا فلاحی کام (جیسا کہ عطیہ دینا، کسی غریب کی مدد کرنا یا کمیونٹی میں صفائی کا کام کرنا) کرنے کا عہد (RSVP) کر رہے ہیں۔

ٹک ٹاک پر @Little_Miss_Contrarian کے نام سے جانی جانے والی خاتون نے ایک بڑا فزیکل برتھ ڈے کارڈ بھی تیار کیا ہے جسے وہ نیویارک کے مختلف مشہور مقامات پر لے کر گھوم رہی ہیں تاکہ عام شہری اس پر اپنے دستخط ثبت کر سکیں۔

اس سلسلے میں جمعرات 16 اکتوبر کو بروکلین میوزیم، پراسپیکٹ پارک، بروکلین برج، سٹی ہال، یونین اسکوائر اور ٹائمز اسکوائر پر خصوصی اجتماعات رکھے گئے تھے، اور منتظمین کا ارادہ ہے کہ یہ کارڈ براہِ راست میئر ظہران ممدانی کو پیش کیا جائے۔

ورچوئل کارڈ پر لوگوں نے میئر کے لیے انتہائی جذباتی اور خوبصورت پیغامات چھوڑے ہیں۔ ایک شہری نے لکھا کہ “میں نے فوڈ پینٹری کی صفائی اور عطیات کا انتظام کیا ہے، اے ممدانی! میں آپ کو بتانا چاہتا ہوں کہ آپ ان چند لوگوں میں سے ہیں جن کی وجہ سے میری زندگی میں امید باقی ہے”۔ ایک اور شہری نے خواتین کے شیلٹر میں مالی عطیہ دینے کا عزم ظاہر کیا۔