کراچی(ویب ڈیسک): پاکستان کرکٹ ٹیم کے سابق کپتان اور مایہ ناز فاسٹ بولر وسیم اکرم نے کراچی اور لاہور کے کھانوں کے درمیان جاری طویل بحث کو ختم کرتے ہوئے اپنا حتمی فیصلہ سنا دیا ہے۔
سوشل میڈیا پر جاری ایک ویڈیو بیان میں ‘سلطان آف سوئنگ’ نے مزاحیہ انداز میں کہا کہ “میں نے لوگوں کو کراچی اور لاہور کے کھانوں پر اس قدر شدت سے بحث کرتے دیکھا ہے کہ لگتا ہے تلواریں اور کلہاڑیاں نکل آئیں گی۔” انہوں نے خود کو اس بحث کا فیصلہ کرنے کے لیے موزوں ترین شخص قرار دیتے ہوئے کہا کہ انہوں نے اپنی زندگی کے 42 سال لاہور میں گزارے ہیں جہاں وہ پیدا ہوئے، جبکہ گزشتہ 14 سالوں سے وہ کراچی کے رہائشی ہیں۔
وسیم اکرم نے سیاست دان فواد چوہدری کے کراچی کے کھانوں سے متعلق تبصروں کا حوالہ دیتے ہوئے کہا کہ وہ اس معاملے کو ہمیشہ کے لیے حل کرنا چاہتے ہیں۔ انہوں نے پی ایس ایل فائنل کے دوران لاہور کے اپنے پسندیدہ چنوں اور گرلڈ چانپوں کا ذکر تو کیا، لیکن ساتھ ہی یہ بھی واضح کیا کہ کراچی میں کھانوں کا تنوع (Diversity) کہیں زیادہ ہے کیونکہ یہاں مختلف ثقافتی پس منظر رکھنے والے لوگ بستے ہیں۔
سابق کپتان نے ایک دلچسپ مشاہدہ بھی شیئر کیا کہ لاہور میں اب کھانے ضرورت سے زیادہ مسالے دار ہو گئے ہیں، جبکہ روایتی لاہوری اتنا مرچ مصالحہ نہیں کھاتے تھے۔
انہوں نے اپنی گفتگو کا اختتام یہ کہتے ہوئے کیا کہ اگرچہ لاہور کا کھانا بہترین ہے، لیکن کھانوں کی اقسام اور ورائٹی کے معاملے میں کراچی کا پلڑا بھاری ہے۔
