نیویارک : اقوام متحدہ کی سلامتی کونسل (UNSC) کے یوکرین کی صورتحال سے متعلق اجلاس میں پاکستان نے دوٹوک اور واضح موقف اختیار کرتے ہوئے کہا ہے کہ فوجی و جنگی طریقوں سے کبھی پائیدار اور پختہ امن قائم نہیں ہو سکتا، بلکہ یہ اقدامات تنازع کے مزید بڑھنے، معصوم انسانوں کے مصائب کو طویل کرنے اور امن کے امکانات کو ختم کرنے کا باعث بنتے ہیں۔
اقوام متحدہ میں پاکستان کے قائم مقام مستقل مندوب سفیر عثمان جدون نے سلامتی کونسل سے خطاب کرتے ہوئے کہا کہ سفارت کاری اور بامقصد مذاکرات ہی اس تنازع سے نکلنے کا واحد اور بہترین راستہ ہیں۔
پاکستان ان تمام بین الاقوامی اور سفارتی کوششوں کی بھرپور حمایت کرتا ہے جو اقوام متحدہ کے چارٹر، بین الاقوامی قوانین اور کثیر الجہتی معاہداں کی روشنی میں تمام فریقین کے تحفظات کو مدنظر رکھتے ہوئے یوکرین جنگ کے دیرپا حل میں معاون ثابت ہوں۔
سفیر عثمان جدون نے زور دے کر کہا کہ ایک فوری اور مضبوط وقفہ بندی فریقین کے درمیان اختلافات کو کم کرنے اور پرامن تصفیے کی سمت بڑھنے کا واحد ذمہ دارانہ راستہ ہے۔
انہوں نے واضح کیا کہ جنگ کے ذریعے مسائل کا حل ڈھونڈنے سے صرف تقسیم گہری ہوگی اور خطے کا امن تباہ ہوگا۔
پاکستان تمام فریقین کے جائز سیکیورٹی خدشات کا احترام کرتے ہوئے ایک جامع، پائیدار اور اقوام متحدہ کے چارٹر کے مطابق پرامن حل کا حامی ہے۔