ایری، پنسلوانیا : امریکی ریاست پنسلوانیا کے شہر ایری (Erie) میں فائرنگ کے ایک انتہائی دلخراش اور ہولناک واقعے میں 2 بچوں سمیت 9 افراد ہلاک ہو گئے ہیں۔ پولیس کے مطابق مشتبہ حملہ آور نے بھی مبینہ طور پر خود کو گولی مار کر خودکشی کر لی ہے۔
امریکی خبر رساں اداروں کے مطابق پولیس کو شام تقریباً 5 بجے پیری اسٹریٹ (Perry Street) کے رہائشی علاقے میں فائرنگ کی اطلاع ملی جہاں ایک مسلح شخص اندھا دھند فائرنگ کرنے کے بعد ایک گھر کے اندر داخل ہو گیا تھا۔ پولیس کارروائی کے دوران دو خواتین کی لاشیں گھر کے باہر جبکہ دیگر لاشیں گھر کے اندر سے برآمد ہوئیں، جبکہ حملہ آور بھی مردہ حالت میں پایا گیا۔
ایری کے پولیس چیف رِک لوراہ (Rick Lorah) نے میڈیا سے گفتگو کرتے ہوئے سانحے پر گہرے دکھ کا اظہار کیا اور کہا کہ “اپنے 28 سالہ کیریئر میں میں نے اس نوعیت کا ہولناک واقعہ نہیں دیکھا”۔
ریاست پنسلوانیا کے گورنر جوش شاپیرو (Josh Shapiro) نے واقعے کی شدید مذمت کرتے ہوئے متاثرہ خاندانوں سے دلی تعزیت کا اظہار کیا اور مقامی انتظامیہ کو مکمل تعاون کی یقین دہانی کروائی۔
پولیس نے واضح کیا ہے کہ علاقے میں اب عوام کو کوئی خطرہ نہیں ہے، تاہم ہلاک ہونے والوں کی شناخت اور فائرنگ کے محرکات کا پتا لگانے کے لیے تفصیلی تحقیقات کا آغاز کر دیا گیا ہے