نیویارک: نیویارک میں پاکستان کے قونصل جنرل عامر احمد اتوزئی نے بروکلین آرٹس کونسل کے زیرِ اہتمام منعقدہ ایک خصوصی ثقافتی مکالمے میں بطور مہمانِ خصوصی شرکت کی۔
اس تقریب میں بروکلین بھر سے ثقافتی ورثے کے ماہرین، فنکاروں اور تخلیقی شخصیات نے بڑی تعداد میں شرکت کی۔
ثقافتی ورثہ ایڈوائزری گروپ (CHAG) کے تحت منظم اس تقریب کا محور روایتی فنون، لوک موسیقی، قصہ گوئی (Storytelling)، رقص اور روایتی کھانوں کے ورثے کا تحفظ اور فروغ تھا۔
اپنے خطاب میں قونصل جنرل نے بروکلین آرٹس کونسل کی جانب سے تنوع اور شمولیت (Inclusivity) کے عزم کو سراہا اور زندہ ثقافتی روایات کو محفوظ بنانے کی اہمیت پر زور دیا۔
تقریب کے دوران ہونے والے انٹرایکٹو سیشن میں فنکاروں نے اپنے خیالات کا اظہار کیا اور مختلف فن پارے پیش کیے، جس کے بعد ایک روایتی ثقافتی عشائیہ بھی دیا گیا۔
قونصل جنرل نے نیویارک میں ثقافتی تعاون اور کمیونٹی روابط کو مضبوط بنانے کے لیے پاکستان کے بھرپور تعاون کا اعادہ کیا۔
