نیویارک: اگر آپ نے کبھی ساؤتھ بروکلین (South Brooklyn) سے نارتھ بروکلین جانے کی کوشش کی ہے، تو آپ یقیناً جانتے ہوں گے کہ یہ کتنا لمبا اور تھکا دینے والا سفر ہے۔ بروکلین کے اس بکھرے ہوئے ٹرانسپورٹ نظام کو جوڑنے اور شہریوں کی سہولت کے لیے نیویارک کے ایک مشہور اسکن کیئر برانڈ ‘دی آرڈنری’ (The Ordinary) نے ایک انتہائی انوکھا اور مفت حل پیش کر دیا ہے۔
ماضی میں 4 ڈالر سے بھی کم قیمت پر انڈے بیچ کر میڈیا کی شہخیوں میں آنے والے اس برانڈ نے اب اس سیزن میں ‘پراسپیکٹ پارک’ (Prospect Park) اور ولیمزبرگ میں واقع ‘ڈومینو پارک’ (Domino Park) کے درمیان ایک بالکل مفت ایکسپریس بس سروس شروع کرنے کا اعلان کیا ہے۔
کمپنی کے نمائندے نے ایک پریس ریلیز میں بتایا:”ایک ایسے علاقے میں جہاں ٹرانزٹ سسٹم انتہائی بکھرا ہوا ہے اور جہاں سب وے کے ذریعے ایک سے دوسری جگہ جانے کے لیے مین ہٹن سے ہو کر 50 منٹ سے زیادہ کا چکر کاٹنا پڑتا ہے، وہاں ‘دی آرڈنری بس’ (The Ordinary Bus) شہریوں کو ایک سیدھا، تیز رفتار اور بالکل مفت متبادل فراہم کر رہی ہے۔”
گوگل میپس کے مطابق، عام طور پر پبلک ٹرانسپورٹ کے ذریعے ان دونوں مقامات کے درمیان سفر کرنے کے لیے مسافروں کو کم از کم دو ٹرینیں اور ایک بس بدلنی پڑتی ہے، یا پھر بس اسٹاپس کے درمیان 19 منٹ پیدل چلنا پڑتا ہے۔ کمپنی کا دعویٰ ہے کہ یہ مفت سروس اس طویل سفر کے وقت کو آدھا کر دے گی۔ کمپنی کا مقصد اسکن کیئر سے ہٹ کر بروکلین کی سڑکوں پر عام لوگوں کے لیے ضروری وسائل تک رسائی کو آسان بنانا ہے۔
یہ محدود مدت کی سروس اگلے منگل سے شروع ہو کر 9 جون تک جاری رہے گی۔ بس کے اوقات درج ذیل ہوں گے:
پیر سے جمعہ: دوپہر 12:00 بجے سے شام 7:00 بجے تک۔
ہفتہ اور اتوار (ویک اینڈ): صبح 8:00 بجے سے شام 7:00 بجے تک۔
مسافر ڈومینو پارک کے قریب ‘کینٹ ایونیو اور ساؤتھ ففتھ اسٹریٹ’ کے چوراہے سے اور پراسپیکٹ پارک کے پاس ‘بروکین پبلک لائبریری’ کے سامنے ایسٹرن پارک وے سے اس بس میں سوار اور اتر سکیں گے۔ مسافروں کی سہولت کے لیے منگل سے ایک آن لائن لائیو بس ٹریکر (Live Bus Tracker) بھی فعال کر دیا جائے گا تاکہ لوگ بس کی آمد کا صحیح وقت دیکھ سکیں