نیویارک: دنیا کے سب سے بڑے فیشن ایونٹ “میٹ گالا 2026” میں اس بار بھارتی نمائندگی نے عالمی میڈیا کی توجہ اپنی جانب مبذول کرالی۔ میٹروپولیٹن میوزیم آف آرٹ میں منعقدہ اس تقریب میں ایشا امبانی کا ‘کوسٹیوم آرٹ’ سے ہم آہنگ لباس سب سے نمایاں رہا۔
ایشا امبانی نے معروف ڈیزائنر گورو گپتا کی تیار کردہ ساڑھی زیب تن کی، جس کی تیاری میں خالص سونے کے تاروں کا استعمال کیا گیا۔ اس شاہکار لباس کو مکمل کرنے کے لیے 50 ماہر کاریگروں نے 1200 گھنٹے تک محنت کی۔ لباس کا ڈیزائن قدیم فریسکو آرٹ اور جدید فیشن کا حسین امتزاج تھا، جس کے ساتھ انہوں نے اپنی والدہ نیتا امبانی کے شاہانہ زیورات پہن کر اپنی شخصیت کو مزید پروقار بنایا۔
تقریب میں پہلی بار بالی ووڈ کے نامور فلمساز کرن جوہر نے بھی شرکت کی، جن کے لباس میں بھارتی زری کے کام کی تعریف کی گئی۔ اس کے علاوہ نتاشا پونا والا، اننیا برلا اور سدھا ریڈی جیسی نمایاں شخصیات نے بھی بھارتی ثقافت، آرٹ اور ٹیکنالوجی کو عالمی پلیٹ فارم پر بھرپور انداز میں پیش کیا۔