ناساؤ کاؤنٹی(ویب ڈیسک): ناساؤ یونیورسٹی میڈیکل سینٹر (NUMC) کے بورڈ آف ڈائریکٹرز کے چیئرمین، اسٹو ربینووٹز نے اپنی تعیناتی کے چند ماہ بعد ہی استعفیٰ دے دیا ہے۔
ربینووٹز، جو کہ ہافسٹرا یونیورسٹی کے سابق صدر بھی رہ چکے ہیں، کو گورنر کیتھی ہوچول نے مئی میں اس وقت تعینات کیا تھا جب ہسپتال شدید مالی بحران اور قیادت کی کمی کا شکار تھا۔
اپنے بیان میں اسٹو ربینووٹز نے کہا کہ ہسپتال اب مستحکم بنیادوں پر کھڑا ہے اور مستقل CEO کی تعیناتی کے بعد یہ ان کے لیے الگ ہونے کا صحیح وقت ہے۔
انہوں نے مزاحیہ انداز میں اپنی اہلیہ نینسی کا ذکر کرتے ہوئے کہا کہ اب وہ اپنا وقت خاندان کے ساتھ گزارنا چاہتے ہیں۔ ان کی جگہ ٹام اسٹوکس (Tom Stokes) اب مستقل طور پر ہسپتال کے CEO کے طور پر فرائض انجام دیں گے۔
ربینووٹز کی تعیناتی اس وقت ہوئی تھی جب ہسپتال کے 10 اعلیٰ عہدیداروں نے گورنر ہوچول کے مبینہ “جارحانہ قبضے” کے خلاف احتجاجاً استعفیٰ دے دیا تھا۔
ربینووٹز کے دور میں ہسپتال نے ریاست سے 110 ملین ڈالر کی فنڈنگ حاصل کی۔ریاست کے خلاف جاری قانونی چارہ جوئی (Litigation) کو ختم کیا گیا۔
ہسپتال کے 167 ملین ڈالر کے متوقع خسارے کو کم کرنے کے لیے اقدامات کیے گئے۔
گورنر کیتھی ہوچول نے ربینووٹز کی خدمات کو سراہتے ہوئے کہا کہ انہوں نے اس وقت ہسپتال کی باگ ڈور سنبھالی جب اسے سنجیدہ قیادت کی اشد ضرورت تھی۔ انہوں نے ربینووٹز کا شکریہ ادا کرتے ہوئے کہا کہ ان کی توجہ مالی نظم و ضبط اور جوابدہی پر رہی جس سے ہسپتال کی بحالی کی راہ ہموار ہوئی۔
