بنگور، مَین(ویب ڈیسک): امریکی ریاست مَین کے بنگور انٹرنیشنل ایئرپورٹ پر اتوار کی شام ایک نجی کاروباری جیٹ طیارہ ٹیک آف کرتے ہوئے حادثے کا شکار ہو گیا۔ فیڈرل ایوی ایشن ایڈمنسٹریشن (FAA) کے مطابق طیارے میں عملے سمیت 8 افراد سوار تھے۔
طیارے کی قسم: بمبارڈیئر چیلنجر 650 (Bombardier Challenger 650)۔
حادثہ مقامی وقت کے مطابق اتوار کی شام تقریباً 7:45 بجےبنگور انٹرنیشنل ایئرپورٹ کا رن وے نمبر 33پر پیش آیا۔
طیارہ ہیوسٹن، ٹیکساس کی ایک کمپنی کے نام پر رجسٹرڈ ہے۔
ذرائع کے مطابق یہ حادثہ اس وقت پیش آیا جب شمال مشرقی امریکہ شدید برفانی طوفان کی زد میں ہے۔ بنگور میں درجہ حرارت نقطہ انجماد سے بہت نیچے تھا اور برف باری کی وجہ سے حدِ نگاہ (visibility) انتہائی کم تھی۔
‘لائیو اے ٹی سی’ (LiveATC.net) سے حاصل کردہ آڈیو ریکارڈنگ کے مطابق، حادثے سے چند منٹ قبل پائلٹ اور کنٹرولرز کے درمیان حدِ نگاہ کی کمی اور طیارے کو برف سے پاک کرنے (de-icing) کے بارے میں گفتگو سنی گئی۔ پائلٹ کو ٹیک آف کی اجازت ملنے کے تقریباً دو منٹ بعد کنٹرولر کو پریشانی میں یہ کہتے ہوئے سنا گیا:
“فیلڈ پر تمام ٹریفک روک دی جائے! طیارہ الٹ گیا ہے، ایک مسافر طیارہ الٹا پڑا ہوا ہے۔”
ایئرپورٹ انتظامیہ کا کہنا ہے کہ ریسکیو ٹیمیں فوری طور پر جائے وقوعہ پر پہنچ گئیں۔ حادثے کے بعد ایئرپورٹ کو پروازوں کے لیے بند کر دیا گیا اور وہاں ہنگامی آپریشنز سینٹر قائم کر دیا گیا ہے۔ فی الحال مسافروں اور عملے کی زخمی ہونے کی نوعیت یا جانی نقصان کے بارے میں کوئی حتمی اطلاع فراہم نہیں کی گئی ہے۔
امریکی ادارے FAA اور نیشنل ٹرانسپورٹیشن سیفٹی بورڈ (NTSB) نے حادثے کی وجوہات جاننے کے لیے باقاعدہ تحقیقات کا آغاز کر دیا ہے۔
