برسلز: رواں سال یورپ میں آنے والی چار لگاتار اور ریکارڈ توڑ شدید گرمی کی لہروں (Heatwaves) کی وجہ سے کم از کم 35,000 سے زائد غیر متوقع ہلاکتیں (Excess Mortality) ریکارڈ کی گئی ہیں۔
یورپی صحت کے اداروں کے مطابق یہ اعداد و شمار تاحال غیر حتمی ہیں اور اگست کے مکمل ارقام و شمار سامنے آنے پر ہلاکتوں کی تعداد میں نمایاں اضافے کا خدشہ ہے۔
جرمنی میں صورتحال: جرمنی میں اپریل سے اگست کے درمیان گرمی سے 14,000 افراد لقمہ اجل بنے، جو ملکی تاریخ کا سب سے بڑا گرمی سے متعلق جانی نقصان ہے۔ صرف جون کے آخری ہفتے میں 9,600 ہلاکتیں ریکارڈ کی گئیں۔
اسپین اور فرانس: اسپین کے ‘کارلوس III ہیلتھ انسٹی ٹیوٹ’ کے مطابق مئی سے اب تک 4,947 اموات گرمی کی وجہ سے ہوئی ہیں، جو کہ 2022 کے ریکارڈ کو بھی توڑ چکی ہیں۔ دوسری جانب فرانس میں جولائی کے آخر تک 7,300 سے زائد اضافی اموات کا اندراج ہو چکا ہے۔
برطانیہ میں 2,877، بلجیم میں 1,222، اور ہالینڈ میں 900 سے زائد اضافی ہلاکتیں رپورٹ ہوئی ہیں۔ اطالوی ماہرینِ وبائی امراض کا اندازہ ہے کہ حتمی رپورٹ تک اٹلی میں یہ تعداد 8,000 تک پہنچ سکتی ہے۔
ماہرین کا کہنا ہے کہ گرمی خود براہِ راست موت کی وجہ کم بنتی ہے، بلکہ یہ دل، گردوں اور سانس کی پہلے سے موجود بیماریوں کو شدت دے دیتی ہے جو ہارٹ اٹیک یا اسٹروک کا باعث بنتی ہیں۔
عالمی ادارہ صحت (WHO) کی خبردار: ڈبلیو ایچ او کے مطابق گزشتہ 20 سالوں کے دوران یورپی خطے میں شدید گرمی سے ہونے والی اموات میں 30 فیصد سے زائد اضافہ ہوا ہے، جس میں موسمیاتی تبدیلی (Climate Crisis) اور آبادی کا بوڑھا ہونا بنیادی عوامل ہیں۔