ٹوکیو: جاپان کے صوبے آوموری (Aomori) میں واقع 400 سال قدیم تاریخی ‘ہیروساکی قلعہ’ (Hirosaki Castle) کو اس کی اصل بنیادوں پر منتقل کرنے کے لیے 1800 سے زائد افراد نے مل کر 360 ٹن وزنی عمارت کو رسیوں کے ذریعے کھینچ کر دو میٹر سے زیادہ آگے منتقل کر دیا ہے۔
عمارت کو بغیر کسی توڑ پھوڑ کے منتقل کرنے کے لیے جاپان کی قدیم روایتی تکنیک ‘ہِکیا’ کا استعمال کیا گیا، جس میں عمارت کے نیچے ریلیں اور رولرز لگا کر اسے سرکایا جاتا ہے۔
قلعے کو کھینچنے کے اس تاریخی اور علامتی مشن کے لیے 8,000 سے زائد افراد نے درخواستیں دیں، جن میں سے قرعہ اندازی کے ذریعے 1,800 افراد کا انتخاب کیا گیا۔ اس میں جاپان کے علاوہ غیر ملکی سیاحوں نے بھی حصہ لیا۔
ایک شدید زلزلے کے بعد قلعے کی زیریں دیوار کو نقصان پہنچا تھا۔ پتھروں سے بنی دیوار کی مرمت اور تمام 2,185 پتھروں کو ان کی اصل جگہ پر لگانے کا کام دسمبر 2024 میں مکمل کیا گیا، جس کے بعد اب قلعے کو واپس اس کی پرانی جگہ لایا جا رہا ہے۔
شہریوں کی مدد سے قلعے کو ہاتھ سے کھینچنے کا یہ جذباتی مرحلہ اگست کے اختتام تک جاری رہے گا، جبکہ بقیہ 73 میٹر کا فاصلہ رواں سال کے آخر تک جدید مشینری کے ذریعے طے کرایا جائے گا۔
ہیروساکی قلعہ جاپان میں بچ جانے والے 12 تاریخی قلعوں میں سے ایک ہے۔ انتظامیہ کے مطابق، مکمل مرمت کے بعد یہ قلعہ 2033 میں دوبارہ عام سیاحوں کے لیے کھولا جائے گا۔