واشنگٹن: امریکی محکمہ خارجہ نے اعلان کیا ہے کہ ریاستہائے متحدہ امریکہ کے قیام کی 250ویں سالگرہ کے موقع پر ایک محدود ایڈیشن پاسپورٹ جاری کیا جائے گا جس میں صدر ڈونلڈ ٹرمپ کی تصویر نمایاں ہوگی۔ یہ اپنی نوعیت کا پہلا واقعہ ہے کہ کسی حاضر سروس امریکی صدر کی تصویر سفری دستاویزات کا حصہ بنے گی۔
محکمہ خارجہ کے ترجمان ٹومی پگوٹ کے مطابق، یہ “لمیٹڈ ایڈیشن” پاسپورٹ جولائی میں یومِ آزادی کی مناسبت سے جاری کیا جا رہا ہے۔ اس کے ڈیزائن میں صدر ٹرمپ کی ایک سنجیدہ تصویر کو 1776 کے اعلامیہ آزادی (Declaration of Independence) کے متن پر نقش کیا گیا ہے، جس کے نیچے ان کے دستخط سنہری حروف میں درج ہیں۔ جہاں ایک طرف ٹرمپ کے حامی اسے ایک تاریخی سنگ میل قرار دے رہے ہیں، وہاں دوسری جانب سیاسی مخالفین اور ڈیموکریٹک پارٹی کے رہنما اسے “ذاتی تشہیر” اور ٹیکس گزاروں کے پیسوں کا ضیاع قرار دے کر تنقید کر رہے ہیں۔
حکام کا کہنا ہے کہ یہ پاسپورٹ صرف واشنگٹن کے پاسپورٹ آفس میں محدود مدت کے لیے دستیاب ہوں گے، جبکہ عام شہری روایتی طریقے سے پرانے ڈیزائن والے پاسپورٹ حاصل کر سکیں گے۔