مدینہ منورہ(ویب ڈیسک): ارضِ مقدس میں حج کے مبارک سیزن کا باقاعدہ آغاز ہو گیا ہے اور عازمینِ حج کا پہلا قافلہ مدینہ منورہ پہنچ چکا ہے۔ نبی کریم ﷺ کے شہر میں قدم رکھتے ہی عازمین کے دل جذبات اور شوقِ زیارت سے لبریز ہو گئے، جہاں سے ان کے اس مقدس سفر کا باقاعدہ آغاز ہو رہا ہے۔
مسجدِ نبوی ﷺ کے پرامن اور روحانی ماحول میں عازمین کی آمد کا سلسلہ جاری ہے، جہاں وہ اپنی عبادات اور دعاؤں کا آغاز کر رہے ہیں۔ سعودی حکام کی جانب سے عازمینِ حج کے استقبال کے لیے بہترین انتظامات کیے گئے ہیں تاکہ انہیں قیام و طعام اور آمد و رفت میں کسی قسم کی دشواری کا سامنا نہ کرنا پڑے۔
واضح رہے کہ رواں سال بھی دنیا بھر سے لاکھوں مسلمان فریضہ حج کی ادائیگی کے لیے سعودی عرب پہنچ رہے ہیں۔ مدینہ منورہ میں قیام کے بعد یہ قافلے مکہ مکرمہ کی جانب روانہ ہوں گے جہاں حج کے مناسک ادا کیے جائیں گے۔
