واشنگٹن / لندن (ویب ڈیسک): امریکی صدر ڈونلڈ ٹرمپ کی جانب سے ایران کے ساتھ جنگ کو “عملی طور پر ختم” قرار دیے جانے کے بعد عالمی مالیاتی اور توانائی کی منڈیوں نے سکون کا سانس لیا ہے۔ منگل کے روز عالمی منڈی میں خام تیل (Brent Crude) کی قیمتیں گر کر 89.66 ڈالر فی بیرل پر آ گئیں، جو 31 اگست 2026ء کے بعد سب سے کم ترین سطح ہے۔
وائٹ ہاؤس بریفنگ کے دوران صدر ٹرمپ نے صحافیوں سے گفتگو کرتے ہوئے کہا کہ “اس وقت ایران کے خلاف مزید فوجی کارروائی کی ضرورت محسوس نہیں ہوتی، تاہم ہماری افواج الرٹ اور مکمل تیار ہیں”۔ ان کے اس بیان کے فوراً بعد پیر کے روز تیل کی قیمتوں میں ہونے والی 6 فیصد گراوٹ کے بعد منگل کو مزید 3 فیصد کی کمی ریکارڈ کی گئی۔
تیل کی قیمتوں میں کمی اور مشرقِ وسطیٰ میں امن کی امیدوں کے باعث یورپ کا Stoxx 600 انڈیکس 0.9 فیصد اضافے کے ساتھ 662.54 کی تاریخی سطح پر پہنچ گیا۔ لندن کا FTSE 100 انڈیکس بھی 45 پوائنٹس اضافے کے ساتھ 10,828 پر بند ہوا۔
ایندھن کی لاگت میں کمی کے امکانات سے لفتھانسا (Lufthansa) کے شیئرز 1.8 فیصد جبکہ ایئر فرانس-کے ایل ایم (Air France-KLM) کے شیئرز 1.2 فیصد بڑھ گئے۔ دوسری جانب تیل کی بڑی کمپنیوں جیسے BP اور Shell کے شیئرز میں 1.5 سے 1.7 فیصد کی گراوٹ دیکھی گئی۔
برطانوی آٹوموبائل ایسوسی ایشن (AA) کے مطابق، خام تیل کی قیمتوں میں مسلسل کمی کے بعد برطانیہ میں پیٹرول کی قیمتوں میں مزید 10 پینس (10p) فی لیٹر کمی کی توقع کی جا رہی ہے، جس سے عام شہریوں کو بڑا ریلیف ملے گا۔
مارکیٹ تجزیہ کاروں کے مطابق، توانائی کی قیمتوں میں کمی سے افراطِ زر کے دباؤ کو کم کرنے میں مدد ملے گی، تاہم امریکی فیڈرل ریزرو (US Fed) سود کی شرح سے متعلق کوئی بھی نیا فیصلہ اکتوبر کے افراطِ زر کے جاری ہونے والے سرکاری اعداد و شمار دیکھنے کے بعد کرے گا۔





