نیویارک: اقوامِ متحدہ میں پاکستان کے مستقل مندوب، سفیر عاصم افتخار احمد نے نیویارک کے دورے پر آئے ہوئے ‘یونائیٹڈ نیشنز ملٹری آبزرور گروپ ان انڈیا اینڈ پاکستان’ (UNMOGIP) کے چیف ملٹری آبزرور، میجر جنرل ریمن سانچیز سے اہم ملاقات کی۔
ملاقات کے دوران مشن کی کارکردگی اور بھارت اور پاکستان کے درمیان لائن آف کنٹرول (LoC) پر آپریشنز کو درپیش حالیہ اور مسلسل رکاوٹوں پر تفصیلی تبادلہ خیال کیا گیا۔
سفیر عاصم افتخار احمد نے آزاد جموں و کشمیر (AJK) اور بھارت کے غیر قانونی زیرِ قبضہ جموں و کشمیر (IIOJK) کے درمیان لائن آف کنٹرول پر اقوامِ متحدہ کے مبصرین کی سرگرمیوں کے لیے پاکستان کے مکمل تعاون اور سہولت کاری کے عزم کا اعادہ کیا۔
پاکستانی مندوب نے اس بات پر زور دیا کہ پاکستان سلامتی کونسل کی متعلقہ قراردادوں کے مطابق مشن کے مینڈیٹ پر مؤثر عملدرآمد کو غیر معمولی اہمیت دیتا ہے۔ انہوں نے واضح کیا کہ خطے میں پائیدار امن کے لیے اقوامِ متحدہ کے مبصرین کا فعال کردار اور غیر جانبدارانہ رپورٹنگ ناگزیر ہے۔