انقرہ (ویب ڈیسک): ترکیہ کی حکومت نے بچوں کو ڈیجیٹل خطرات اور اخلاقی گراوٹ سے بچانے کے لیے سوشل میڈیا تک رسائی محدود کرنے کا فیصلہ کر لیا ہے۔ رواں ہفتے پارلیمانی کمیٹی کی جانب سے پیش کردہ ایک جامع رپورٹ میں 16 سال سے کم عمر بچوں پر سوشل میڈیا کے استعمال پر مکمل پابندی اور 18 سال کی عمر تک لازمی مواد کی فلٹرنگ کی سفارش کی گئی ہے۔
سوشل میڈیا پلیٹ فارمز کے لیے صارفین کی عمر کی سخت تصدیق کا نظام نافذ کرنا لازمی ہوگا۔
18 سال سے کم عمر بچوں کے لیے رات کے مخصوص اوقات میں انٹرنیٹ کے استعمال کو محدود کرنے کی تجویز دی گئی ہے۔
تمام سروس فراہم کرنے والے اداروں کو ایسا سسٹم بنانا ہوگا جو بچوں تک پہنچنے والے مواد کو خودکار طریقے سے فلٹر کر سکے۔
بچوں کے ویڈیو گیمز اور مصنوعی ذہانت والے کھلونوں کی نگرانی کی جائے گی تاکہ نقصان دہ مواد کو روکا جا سکے۔
ترکیہ کا یہ اقدام آسٹریلیا، اسپین، یونان اور برطانیہ جیسے ممالک کی صف میں شامل ہونے کی کڑی ہے، جہاں پہلے ہی بچوں کی ذہنی صحت اور حفاظت کے پیشِ نظر ایسی پابندیاں لگائی جا چکی ہیں۔
صدر طیب اردگان کی حکمران جماعت (AK Party) کا کہنا ہے کہ ان اقدامات کا مقصد نئی نسل کو ڈیجیٹل نشے اور معاشرتی بگاڑ سے محفوظ رکھنا ہے۔
