نیویارک: نیویارک سٹی کے میئر زہران ممدانی نے تصدیق کی ہے کہ گزشتہ ہفتے کے آخر میں شہر کو لپیٹ میں لینے والے خطرناک موسم اور برفانی طوفان کے باعث کم از کم 7 نیویارکرز ہلاک ہو گئے ہیں۔
میئر ممدانی نے پیر کے روز ایک پریس کانفرنس کے دوران انکشاف کیا کہ ہلاک ہونے والوں میں سے کچھ افراد ماضی میں بے گھر افراد کی پناہ گاہوں میں رہ چکے تھے۔ انہوں نے متاثرہ خاندانوں سے تعزیت کا اظہار کرتے ہوئے کہا کہ “کسی بھی انسانی جان کا ضیاع ایک بہت بڑا المیہ ہے، اسی لیے ہم شہریوں سے مسلسل اپیل کر رہے ہیں کہ وہ محفوظ اور گرم مقامات پر منتقل ہو جائیں۔”
اگرچہ ہلاکتیں شدید سردی کے دوران ہوئیں، تاہم میئر کا کہنا ہے کہ ابھی یہ واضح نہیں کہ موت کی حتمی وجہ سردی تھی یا کچھ اور؛ اس کا تعین میڈیکل ایگزامینر کی رپورٹ کے بعد کیا جائے گا۔
شہر میں شدید ترین سردی کے باعث ‘کوڈ بلیو’ (Code Blue) نافذ کر دیا گیا ہے۔ یہ ایک ایسا پروٹوکول ہے جس کے تحت شہر بھر میں وارمنگ سینٹرز (گرماہٹ فراہم کرنے والے مراکز) کھول دیے جاتے ہیں۔ بے گھر افراد کی پناہ گاہوں (Shelters) پر کسی کو بھی داخلے سے روکنے پر پابندی عائد کر دی جاتی ہے۔
سہ ریاستی (Tri-state) علاقے میں ایک فٹ سے زائد برف باری ریکارڈ کی گئی۔میئر کے مطابق پیر کی صبح 10 بجے تک نیویارک سٹی کی تمام سڑکوں سے برف ہٹا کر صفائی کا کام مکمل کر لیا گیا تھا۔
انتظامیہ نے عوام سے اپیل کی ہے کہ اگر وہ سڑک پر کسی بے گھر شخص کو دیکھیں تو فوری طور پر 311 پر کال کریں تاکہ امدادی ٹیمیں (Outreach workers) بروقت پہنچ کر ان کی مدد کر سکیں۔
