نیویارک (ویب ڈیسک): گوگل نے اپنی مصنوعی ذہانت (AI) پر مبنی خدمات کا دائرہ وسیع کرتے ہوئے ویڈیو شیئرنگ پلیٹ فارم یوٹیوب کے لیے ایک انقلابی فیچر “Ask YouTube” متعارف کرا دیا ہے۔ ٹیکنالوجی ماہرین کا ماننا ہے کہ یہ نیا فیچر یوٹیوب پر سرچنگ کے روایتی انداز کو مکمل طور پر بدل کر رکھ دے گا۔
غیر ملکی خبر رساں ادارے کے مطابق، گوگل حکام نے اس نئے فیچر کی تفصیلات بتاتے ہوئے کہا ہے کہ اب صارفین یوٹیوب پر کسی بھی موضوع کے حوالے سے تفصیلی اور پیچیدہ سوالات پوچھ سکیں گے۔ اس فیچر کی خاص بات یہ ہے کہ یہ نہ صرف صارف کے سوال سے متعلقہ بہترین ویڈیوز تجویز کرے گا، بلکہ ان ویڈیوز کا خلاصہ (سمری) اور اضافی معلومات بھی ٹیکسٹ کی صورت میں فراہم کرے گا۔
“Ask YouTube” کی سب سے بہترین خصوصیت یہ ہے کہ یہ صارف کو پوری ویڈیو دیکھنے کے بجائے براہِ راست اس مخصوص حصے (Timestamp) پر لے جائے گا جہاں مطلوبہ معلومات موجود ہوں۔ اس سے صارفین کا وقت بچے گا اور انہیں طویل ویڈیوز دیکھنے کی ضرورت نہیں رہے گی۔ مزید برآں، صارفین کسی چیٹ بوٹ (Chatbot) کی طرح فالو اپ سوالات بھی پوچھ سکیں گے۔
گوگل کے سی ای او سندر پچائی نے سالانہ ڈیولپر کانفرنس کے دوران اس فیچر کا باقاعدہ اعلان کیا۔ انہوں نے کہا:”Ask YouTube معلومات تک رسائی کو زیادہ تیز، آسان اور مؤثر بنائے گا اور یہ صارفین کے لیے مواد کی تلاش کو انتہائی سہل کر دے گا۔”
یہ فیچر کون استعمال کر سکتا ہے؟
ابتدائی مرحلے میں یہ فیچر تجرباتی طور پر صرف امریکہ میں 18 سال یا اس سے زائد عمر کے یوٹیوب پریمیئم (YouTube Premium) صارفین کے لیے پیش کیا گیا ہے۔ تاہم، گوگل کا کہنا ہے کہ جلد ہی اس فیچر کو دنیا کے دیگر ممالک اور تمام صارفین تک توسیع دی جائے گی۔