سان فرانسسکو (ویب ڈیسک): مائیکروسافٹ نے ونڈوز 11 (ورژنز 24H2 اور 25H2) کے لیے جولائی 2026 کا اہم ترین ‘پیچ ٹیوزڈے’ (Patch Tuesday) اپ ڈیٹ جاری کر دیا ہے۔ KB5101650 کے نام سے جاری ہونے والے اس اپ ڈیٹ میں جہاں 570 سے زائد سیکیورٹی خامیوں کو دور کیا گیا ہے، وہاں صارفین کی سہولت کے لیے کئی زبردست اور بڑے فیچرز بھی شامل کیے گئے ہیں۔
1۔ ونڈوز اپ ڈیٹ کو روکنے (Pause) کا نیا طریقہ
ونڈوز اپ ڈیٹ میں اب کیلنڈر کی طرز کا کنٹرول شامل کیا گیا ہے۔ اب صارفین اپ ڈیٹس کو 35 دنوں کے لیے اپنی مرضی کی تاریخ منتخب کر کے روک سکتے ہیں۔ یہ مدت ختم ہونے پر ونڈوز اپ ڈیٹس خود بخود بحال ہو جائیں گی، تاہم صارف چاہیں تو دوبارہ تاریخ آگے بڑھا سکتے ہیں۔
2۔ پوائنٹ ان ٹائم ریسٹور (Point-in-Time Restore)
اگر اپ ڈیٹ کے بعد سسٹم میں کوئی خرابی آتی ہے تو اب صارفین ‘پوائنٹ ان ٹائم ریسٹور’ کے ذریعے اپنے پی سی کو حالیہ خودکار ریسٹور پوائنٹ پر واپس لے جا سکیں گے۔ اس سے ایپس، سیٹنگز اور ذاتی فائلیں محفوظ رہیں گی اور سسٹم کو ٹھیک کرنا انتہائی آسان ہو جائے گا۔
3۔ وجیٹس (Widgets) اب ڈسٹرب نہیں کریں گے
صارفین کی شکایت پر اب وجیٹس پر صرف ماؤس لے جانے (Hover) سے وہ اوپن نہیں ہوں گے۔ نوٹیفیکیشن بیجز کی تعداد بھی کم کر دی گئی ہے اور اب پہلی بار کلک کرنے پر یہ ڈیش بورڈ کی صورت میں کھلے گا۔
4۔ فائل ایکسپلورر (File Explorer) کی رفتار میں اضافہ
فائل ایکسپلورر کے کھلنے کی رفتار کو مزید تیز کر دیا گیا ہے۔ ایڈریس بار میں ڈبل بیک سلیش (\) اور کوٹیشن مارکس کے ساتھ پاتھ سرچ کرنے کی سہولت دی گئی ہے۔ اس کے علاوہ ون ڈرائیو کی ڈپلیکیٹ فائلوں اور نام تبدیل کرنے کے عمل میں آنے والے بگز کو بھی دور کر دیا گیا ہے۔
5۔ ایکسیسیبلٹی اور اسکرین ٹنٹ (Screen Tint)
آنکھوں کے کھچاؤ اور تھکن کو کم کرنے کے لیے نیا ‘اسکرین ٹنٹ’ فیچر متعارف کرایا گیا ہے، جس سے اسکرین پر کلر اوورلے لاگو کیا جا سکے گا۔ میگنیفائر (Magnifier) میں زوم پرسنٹیج کو مزید باریکی سے کنٹرول کرنے کی سہولت بھی دی گئی ہے۔
6۔ وائس ٹائپنگ میں نئی زبانیں اور لوکل AI ماڈلز
وائس ایکسیس اور وائس ٹائپنگ کے لیے اب فرانسیسی، جرمن اور ہسپانوی زبانوں کی سپورٹ شامل کر دی گئی ہے جو اب شور والے ماحول میں بھی گرامر اور املا کی غلطیاں خود درست کر سکے گی۔ یہ فیچر خاص طور پر Copilot+ PCs کے لیے ہے۔ مزید برآں، 32 جی بی سے زائد ریم والے کمپیوٹرز پر اب بڑے لوکل اے آئی (AI) ماڈلز زیادہ بہتر طریقے سے چل سکیں گے۔
ڈیل (Dell) کے لیپ ٹاپس کے لیے عارضی روک تھام
مائیکروسافٹ کے مطابق انٹیل پروسیسرز والے ڈیل کے مخصوص کمپیوٹرز پر یہ اپ ڈیٹ فی الحال دستیاب نہیں ہوگی۔ ڈیل نے رپورٹ کیا ہے کہ اس اپ ڈیٹ سے سسٹم اچانک بند ہونے، کارکردگی متاثر ہونے اور بیٹری جلدی ختم ہونے جیسے مسائل پیدا ہو رہے ہیں، جن پر دونوں کمپنیاں مل کر کام کر رہی ہیں۔