واشنگٹن / مسقط (ویب ڈیسک): مشرق وسطیٰ میں تیزی سے بڑھتی ہوئی شدید کشیدگی اور غیر یقینی سیکیورٹی صورت حال کے پیش نظر امریکہ نے خطے میں موجود اپنے تمام شہریوں کے لیے ہائی الرٹ اور ہنگامی سفری انتباہ (Travel Advisory) جاری کر دیا ہے۔
امریکا نے اپنے شہریوں کو متنبہ کیا ہے کہ حالات کسی بھی وقت غیر متوقع طور پر زیادہ خراب ہو سکتے ہیں، لہٰذا وہ محتاط رہیں اور ضرورت پڑنے پر فوری انخلا (Evacuation) کے لیے تیار رہیں۔
امریکی محکمہ خارجہ نے اسرائیل، بحرین، عراق، اردن، کویت، لبنان، عمان، قطر، سعودی عرب اور متحدہ عرب امارات (UAE) میں قائم اپنے سفارت خانوں کے ذریعے شہریوں کو الرٹ جاری کیا ہے۔ انتباہ میں کہا گیا ہے کہ سیکیورٹی کی گرتی ہوئی صورت حال کی وجہ سے پروازیں منسوخ ہو سکتی ہیں اور فضائی حدود (Airspace) کی اچانک بندش کا سامنا کرنا پڑ سکتا ہے۔
عمان میں امریکی سفارت خانے کے مطابق خطے کی بعض ایئرلائنز نے اپنے فلائٹ آپریشنز ملتوی یا منسوخ کر دیے ہیں۔ سفارت خانے نے مشرق وسطیٰ میں موجود امریکیوں کو ہدایت کی ہے کہ وہ یہاں سے فوری روانگی پر غور کریں یا کسی بھی ہنگامی صورت حال میں ملک چھوڑنے کے لیے تیار رہیں۔
دوسری جانب اردن میں امریکی سفارت خانے نے اپنے شہریوں کو تمام ملٹری بیسز، ہوٹلوں، ہوائی اڈوں اور حساس انفراسٹرکچر سے دور رہنے کی سخت ہدایت کی ہے، کیونکہ ان مقامات کے نشانہ بننے کا خطرہ موجود ہے۔
امریکی حکام نے موقف اپنایا ہے کہ ایرانی حکومت اور اس کے حمایتی گروپس کا رویہ انتہائی غیر متوقع ہے۔ ایرانی حملوں کا دائرہ کار مصر جیسے نئے علاقوں تک بھی پھیل چکا ہے۔
سفارت خانے کے بیان میں کہا گیا ہے ”ماضی میں امریکی سفارتی تنصیبات اور کاروباری ادارے نشانہ بنتے رہے ہیں۔ ایران اور اس کی حمایت یافتہ تنظیمیں دنیا بھر میں امریکی مفادات کو نشانہ بنا سکتی ہیں۔ یہ حقیقت کہ ماضی میں کسی ملک میں حملہ نہیں ہوا، اس بات کی ضمانت نہیں کہ وہاں مستقبل میں بھی کوئی خطرہ نہیں ہوگا۔“
امریکی حکومت نے اپنے شہریوں کو درج ذیل احتیاطی تدابیر پر عمل کرنے کا حکم دیا ہے
ہر قسم کے مظاہروں، سیاسی اجتماعات اور بھاری پولیس نفری والے علاقوں میں جانے سے گریز کریں۔
کم نمایاں رہیں (Low Profile): امریکی وابستگی ظاہر کرنے والے عوامی مقامات پر غیر معمولی احتیاط برتیں اور توجہ کا مرکز بننے سے بچیں۔
ایئرلائنز سے رابطہ رکھیں: پروازوں کی منسوخی یا تبدیلی کی صورت میں براہِ راست ایئرلائن انتظامیہ سے رابطہ کریں۔
اسمارٹ ٹریولر پروگرام (STEP): تمام امریکی شہری فوری طور پر محکمہ خارجہ کے Smart Traveler Enrollment Program (STEP) میں اپنا اندراج کروائیں تاکہ ہنگامی صورت حال میں سفارت خانہ ان سے فوری رابطہ کر سکے۔