مکہ مکرمہ (ویب ڈیسک): سعودی وزارتِ حج و عمرہ اور زائرین کے تجرباتی پروگرام (Pilgrim Experience Program) نے انکشاف کیا ہے کہ امسال 15 ذوالحجہ سے لے کر ماہِ محرم کے اختتام تک عمرہ ویزا پر آنے والے بین الاقوامی زائرین کی تعداد میں پچھلے سال کے اسی عرصے کے مقابلے میں 22.5 فیصد کا نمایاں اضافہ ریکارڈ کیا گیا ہے۔
رپورٹ کے مطابق، اس نئے عمرہ سیزن کے ابتدائی دورانیے میں دنیا بھر سے مکہ مکرمہ پہنچنے والے زائرین کی کل تعداد 1.27 ملین (12 لاکھ 70 ہزار) سے تجاوز کر گئی ہے۔ سعودی حکام کا کہنا ہے کہ زائرین کی تعداد میں اس ریکارڈ اضافے کی بڑی وجہ سعودی قیادت کی بھرپور سرپرستی، تمام متعلقہ محکموں کے درمیان بہترین ہم آہنگی، اور سعودی ویژن 2030 کے تحت ڈیجیٹل اور آپریشنل سروسز کی مسلسل اپ گریڈیشن ہے۔
اعداد و شمار کے مطابق، عمرہ کی ادائیگی کے لیے آنے والے 75 فیصد زائرین نے فضائی راستے (ہوائی جہاز) کا انتخاب کیا۔ دنیا بھر کے ممالک میں سے برادر اسلامی ملک پاکستان 200,000 زائرین کے ساتھ پہلے نمبر پر رہا۔ اس فہرست میں انڈونیشیا 170,000 زائرین کے ساتھ دوسرے اور عراق 130,000 زائرین کے ساتھ تیسرے نمبر پر ہے۔
سعودی وزارتِ حج و عمرہ نے اپنے بیان میں عزم کا اظہار کیا ہے کہ عمرہ سسٹم کی ڈیجیٹل رسائی اور آپریشنل کارکردگی کو مزید بہتر بنانے کا عمل مستقبل میں بھی جاری رکھا جائے گا تاکہ دنیا بھر سے آنے والے مہمانوں کو سفر کی منصوبہ بندی سے لے کر واپسی تک ایک آسان، باسہولت اور اعلیٰ معیار کا تجربہ فراہم کیا جا سکے۔