بیجنگ (ویب ڈیسک): مشہور اسمارٹ فون برانڈ ‘ریل می’ (Realme) نے اپنی کاروباری حکمتِ عملی میں ایک بڑی تبدیلی کرتے ہوئے چین میں نئے پروڈکٹس کی تیاری اور ڈیولپمنٹ کو عارضی طور پر روکنے کا اعلان کیا ہے۔ کمپنی اب اپنے تمام تر وسائل اور توجہ کو تقریباً مکمل طور پر بیرونِ ملک (اوورسیز) مارکیٹس میں اپنی پوزیشن مضبوط کرنے کے لیے استعمال کرے گی۔
ریل می کی جانب سے جاری کردہ ایک آفیشل بیان کے مطابق، مستقبل میں لانچ ہونے والے تمام نئے اسمارٹ فونز اور اپ ڈیٹس بنیادی طور پر چینی مارکیٹ کے بجائے عالمی صارفین (Global Users) کو ہدف بنا کر تیار کیے جائیں گے۔ کمپنی کا کہنا ہے کہ کاروباری حکمتِ عملی کا باریک بینی سے جائزہ لینے کے بعد چین میں آپریشنز پر “پاز بٹن” (Pause Button) دبانے کا فیصلہ کیا گیا ہے۔ اب ریل می اپنی تمام تر توانائیاں بیرونِ ملک مارکیٹس پر مرکوز کرے گی، جہاں کارکردگی (Performance) اور خاص طور پر گیمنگ پر مبنی اسمارٹ فونز پر زیادہ توجہ دی جائے گی۔
کمپنی نے اس بات پر زور دیا ہے کہ اس فیصلے کا ہرگز یہ مطلب نہیں ہے کہ وہ چین میں موجود اپنے پرانے صارفین کو تنہا چھوڑ رہی ہے۔ ریل می نے تصدیق کی ہے کہ چین میں موجودہ صارفین کو آفٹر سیلز سروسز، سافٹ ویئر اپ ڈیٹس اور وارنٹی سپورٹ ملتی رہے گی۔ تاہم، اس ڈھانچے میں تبدیلی کے بعد یہ تمام سروسز اب ‘اوپو’ (Oppo) کی جانب سے فراہم کی جائیں گی تاکہ نئے فونز نہ بننے کے باوجود پرانے صارفین کو کسی مشکل کا سامنا نہ کرنا پڑے۔
یہ اہم قدم ایک ایسے وقت میں اٹھایا گیا ہے جب اوپو (Oppo) اپنے ماتحت اسمارٹ فون برانڈز کے کرداروں کو ازسرِ نو ترتیب دے رہا ہے۔ رپورٹ کے مطابق، اس نئی حکمتِ عملی کے تحت ریل می اب مکمل طور پر بیرونی ممالک کی مارکیٹ سنبھالے گی، جبکہ ‘ون پلس’ (OnePlus) بنیادی طور پر چین کی مقامی مارکیٹ پر توجہ مرکوز کرے گا۔ اس ری اسٹرکچرنگ کے تحت ون پلس بھارت میں اپنے صارفین کو سافٹ ویئر اپ ڈیٹس کی فراہمی جاری رکھے گا، لیکن یورپ اور شمالی امریکا میں نئے پروڈکٹس کی لانچنگ کو فی الحال روک رہا ہے۔
اس بڑی تبدیلی کا بنیادی مقصد یہ ہے کہ تمام برانڈز ایک ہی کسٹمر بیس کے لیے آپس میں مقابلہ کرنے کے بجائے مختلف مارکیٹس پر توجہ دیں اور اپنی کارکردگی کو بہتر بنا سکیں۔