ممبئی (ویب ڈیسک): اپنے منفرد انداز اور بے باک بیانات کی وجہ سے خبروں میں رہنے والی بھارتی اداکارہ، ماڈل اور سوشل میڈیا شخصیت راکھی ساونت (Rakhi Sawant) نے ایک بار پھر اپنے نئے انٹرویو سے سرحد کے دونوں پار لوگوں کی توجہ حاصل کرلی ہے۔
بی بی سی ہندی (BBC Hindi) کو دیے گئے ایک خصوصی انٹرویو میں راکھی ساونت نے پاکستان سے ملنے والی محبت اور جذباتی حمایت کا تذکرہ کرتے ہوئے کہا کہ پاکستانی مداحوں نے ہمیشہ ہر مشکل وقت اور بیماری میں ان کا ساتھ دیا ہے۔
انٹرویو کے دوران راکھی ساونت نے کہا کہ پاکستانی عوام انہیں بے حد پسند کرتے ہیں اور ان کی خیریت کی ہر لمحہ خبر رکھتے ہیں۔ انہوں نے انکشاف کیا
”جب میں بیمار پڑی تو کئی پاکستانی مداحوں نے میری خیریت دریافت کی، حتیٰ کہ مجھے علاج کے لیے اسپتال لے جانے تک کی پیشکش کی۔ بعض اوقات مجھے ایسا لگا کہ اپنے ملک سے بھی زیادہ محبت اور توجہ مجھے پاکستان کے لوگوں سے ملی ہے۔“
اداکارہ کا کہنا تھا کہ بھارت اور پاکستان کے درمیان سیاسی اختلافات اپنی جگہ موجود ہیں، لیکن دونوں ملکوں کے عام لوگوں کے جذبات اس سے بالکل مختلف ہیں۔ ہمسایہ ہونے کے ناطے پاکستانیوں کے دل میں ان کے لیے احترام اور شفقت کا جو جذبہ ہے، وہ اسے کبھی فراموش نہیں کر سکتیں۔
راکھی ساونت کی اس گفتگو کی ویڈیو دیکھتے ہی دیکھتے سوشل میڈیا پر وائرل ہو گئی، جس پر پاکستان اور بھارت دونوں ممالک کے صارفین نے مثبت اور دلچسپ تبصرے کیے۔
اکثر صارفین کا کہنا تھا کہ دونوں ملکوں کے عام عوام ایک دوسرے کے دشمن نہیں ہیں بلکہ سیاسی صورتحال اور سرحد کے تنازعات نے فاصلے پیدا کیے ہیں۔ صارفین نے امید ظاہر کی کہ فن، ثقافت اور عوامی روابط مستقبل میں دونوں ہمسایہ ممالک کے لوگوں کو ایک دوسرے کے مزید قریب لانے میں اہم کردار ادا کر سکتے ہیں۔