ویٹیکن سٹی: پوپ لیو نے اتوار کے روز ‘ورلڈ پریس فریڈم ڈے’ (صحافت کی آزادی کے عالمی دن) کے موقع پر دنیا بھر میں میڈیا پر بڑھتی ہوئی پابندیوں اور صحافیوں کے خلاف تشدد کی شدید مذمت کی ہے۔
سینٹ پیٹرز اسکوائر میں دعائیہ اجتماع سے خطاب کرتے ہوئے انہوں نے ان صحافیوں کو خراجِ عقیدت پیش کیا جو جنگ زدہ علاقوں میں رپورٹنگ کے دوران اپنی جانیں گنوا بیٹھے۔
پوپ نے کہا کہ “آج ہم صحافت کی آزادی کا دن منا رہے ہیں، لیکن بدقسمتی سے اس حق کی اکثر کھلم کھلا یا خفیہ طریقوں سے خلاف ورزی کی جاتی ہے۔” انہوں نے مزید کہا کہ صحافت معاشرے اور جمہوریت کا ایک اہم ستون ہے اور معلومات ایک ایسی عوامی شے ہے جسے ہیرا پھیری اور سنسر شپ سے محفوظ رکھنا ضروری ہے۔
پوپ لیو نے عالمی برادری پر زور دیا کہ وہ حق گوئی کی خاطر جان دینے والے رپورٹرز کو یاد رکھیں اور ان صحافیوں کی رہائی کا مطالبہ کیا جنہیں غیر منصفانہ طور پر حراست میں لیا گیا ہے۔
