ٹوکیو: پوکیمون کے پروڈیوسر ماساکی ہوشینو نے انکشاف کیا ہے کہ مستقبل میں پوکیمون کی اقسام کی تعداد 10,000 تک پہنچ سکتی ہے۔ حال ہی میں اعلان کردہ نئے گیم ‘Pokémon Champions’ کو ایک طویل مدتی پلیٹ فارم کے طور پر تیار کیا جا رہا ہے جو روایتی گیمز کے برعکس “ہمیشہ” جاری رہے گا۔
ہوشینو کے مطابق، اس وقت پوکیمون کی کل تعداد 1,025 ہے، لیکن نئے پروجیکٹ میں اس تعداد کو 2,000، 3,000 اور بالآخر 10,000 تک لے جانے کی گنجائش رکھی گئی ہے۔ تاہم، گیم میں توازن برقرار رکھنے کے لیے تمام پوکیمون ایک ساتھ دستیاب نہیں ہوں گے، بلکہ انہیں مخصوص “بلاک” یا گروپس کی صورت میں باری باری (Rotate) شامل کیا جائے گا، تاکہ مقابلہ منصفانہ رہے۔
یہ گیم خاص طور پر ‘بیٹل فوکسڈ’ (Battle-focused) ہوگی، جس کا مقصد کھلاڑیوں کو عالمی سطح پر مقابلے کے بہترین مواقع فراہم کرنا ہے۔ ماہرین کا کہنا ہے کہ 30 سالوں میں 1,000 پوکیمون بنانے کے بعد، 10,000 کا ہدف اس فرنچائز کے لیے ایک بہت بڑا چیلنج اور نیا سنگ میل ثابت ہوگا۔