میساچوسٹس(ویب): امریکہ میں پاکستان کے سفیر جناب رضوان سعید شیخ نے ہارورڈ یونیورسٹی میں منعقدہ پاکستان کانفرنس بعنوان “پاکستان: پوٹینشل سے پرفارمنس تک” (Pakistan: From Potential to Performance) میں شرکت کی۔ اس موقع پر نیویارک میں پاکستان کے قونصل جنرل عامر احمد اتوزئی بھی ان کے ہمراہ تھے۔
پاکستانی اسٹوڈنٹس ایسوسی ایشن کے زیرِ اہتمام ہونے والی اس کانفرنس میں طلبہ، محققین، ماہرینِ تعلیم، صحافیوں اور رائے عامہ ہموار کرنے والے افراد کی بڑی تعداد نے شرکت کی۔ کانفرنس کا محور یہ تھا کہ پاکستان کس طرح گورننس، معیشت، ماحولیاتی لچک اور انسانی فلاح و بہبود کے شعبوں میں بڑے پیمانے پر ترقی حاصل کر سکتا ہے۔
سفیر رضوان سعید شیخ نے اپنے خطاب میں پاکستان کے قدرتی وسائل اور نوجوان افرادی قوت کو ملک کا عظیم ترین اثاثہ قرار دیا۔ انہوں نے کہا کہ پاکستان نے قیامِ امن اور دہشت گردی کے خلاف جنگ میں بے پناہ قربانیاں دیں اور ان چیلنجز سے مزید مضبوط ہو کر نکلا۔
انہوں نے بانیِ پاکستان قائدِ اعظم کے وژن کا حوالہ دیتے ہوئے کہا کہ پاکستان اپنی جغرافیائی اہمیت کی بدولت عالمی امور میں ایک کلیدی ریاست کا درجہ رکھتا ہے۔
انہوں نے اس بات پر زور دیا کہ پاکستان اور امریکہ کے تعلقات ایک دیرینہ ضرورت ہیں اور انہوں نے عالمی اسٹیک ہولڈرز کو پاکستان کے ساتھ شراکت داری کی دعوت دی۔
