نیویارک: اقوام متحدہ کی جنرل اسمبلی کے سالانہ اجلاس کے آغاز کے موقع پر نیویارک شہر میں دنیا بھر کے عالمی رہنماؤں کی آمد کے پیش نظر سیکیورٹی کے سخت ترین انتظامات اور شدید ٹریفک جام کا خدشہ ظاہر کیا گیا ہے۔
پیر سے شروع ہونے والے سفارتی اجلاس میں ایران، اسرائیل اور یوکرین کے سربراہان مملکت سمیت دنیا بھر کے رہنما شرکت کر رہے ہیں۔ مین ہیٹن بالخصوص ایسٹ سائیڈ میں وی آئی پی موٹر کیڈز کی آمدورفت کی وجہ سے شدید ٹریفک متاثر ہونے کی توقع ہے، جبکہ ہفتے بھر کے لیے خصوصی سیکیورٹی پلان نافذ کر دیا گیا ہے۔
اس اجلاس میں سب سے زیادہ توجہ اسرائیلی وزیراعظم بنیامن نیتن یاہو کی آمد اور ان کی آمد کے خلاف متوقع احتجاجی مظاہروں پر مرکوز ہے۔ اس معاملے پر اس وقت زیادہ توجہ دی جا رہی ہے جب میئر زوہران کوامے ممدانی نے واضح کیا کہ انہوں نے جنگی جرائم کے الزامات کے تحت نیتن یاہو کی گرفتاری کا قانونی جائزہ لیا تھا، تاہم کوئی قانونی جواز نہ ملنے کی تصدیق ہوئی۔
مظاہروں سے متعلق سوال کے جواب میں میئر ممدانی نے شہریوں کے آئینی حق پر زور دیتے ہوئے کہا “میں نے کبھی مظاہروں کی ترغیب نہیں دی، لیکن میں نے ہمیشہ یہی کہا ہے کہ شہریوں کو اس شہر میں احتجاج کا پورا حق حاصل ہے اور ہم اس کا احترام کرتے ہیں۔ یہ شہر آئین اور پہلی ترمیم (First Amendment) پر فخر کرتا ہے۔”
سیکرٹ سروس کے نیویارک فیلڈ آفس کے اسپیشل ایجنٹ انچارج میٹ میک کول نے واضح پیغام دیتے ہوئے کہا “جو بھی ہمارے موٹر کیڈ میں خلل ڈالنے کا سوچے گا، وہ بہت جلد جیل میں ہوگا۔ دنیا میں چاہے جتنی بھی جنگیں یا سیاسی تنازعات چل رہے ہوں، غیر ملکی رہنما یہاں ایک محفوظ ماحول میں آئیں گے اور اپنا کام انجام دیں گے۔”
میئر اور پولیس کمشنر بدھ کے روز پریس کانفرنس میں مزید سیکیورٹی تفصیلات فراہم کریں گے۔