نیویارک (ویب ڈیسک): نیویارک سٹی کے میئر زہران کوامے ممدانی (Zohran Kwame Mamdani) نے سوشل میڈیا پر اپنے ایک اہم بیان میں تارکینِ وطن کے حقوق کی حمایت کرتے ہوئے کہا ہے کہ حقیقی عوامی تحفظ کا مطلب ہرگز یہ نہیں کہ نقاب پوش مسلح اہلکار سڑکوں سے لوگوں کو اٹھا کر لے جائیں۔
میئر نے اپنے پیغام میں تارکینِ وطن کے ساتھ کامل یکجہتی کا اظہار کرتے ہوئے واضح کیا کہ نیویارک میں مقیم تمام تر تارکینِ وطن اس شہر کا لازمی اور اہم حصہ ہیں اور سٹی انتظامیہ ان کے حقوق کے تحفظ کے لیے ان کے ساتھ مضبوطی سے کھڑی ہے۔
میئر ممدانی نے اعلان کیا کہ اگر کسی بھی شہری کو امیگریشن سے متعلق کوئی بھی قانونی مدد درکار ہو تو وہ شہر کی مخصوص امیگریشن لیگل سپورٹ ہاٹ لائن سے رجوع کر سکتا ہے۔
انہوں نے بتایا کہ یہ ہیلپ لائن مکمل طور پر مفت اور خفیہ ہے۔
یہ سہولت نیویارک کے ہر رہائشی کے لیے دستیاب ہے، قطع نظر اس کے کہ اس کی امیگریشن کی قانونی حیثیت (Status) کیا ہے۔
شہری کسی بھی قانونی رہنمائی یا معاونت کے لیے ٹول فری نمبر 1-800-354-0365 پر بلا جھجھک رابطہ کر سکتے ہیں۔
میئر ممدانی کا یہ سخت اور دوٹوک بیان ایسے وقت میں سامنے آیا ہے جب پورے امریکہ میں امیگریشن پالیسیوں، وفاقی ایجنٹس کے طریقۂ کار اور شہری حقوق پر ایک نئی بحث چھڑی ہوئی ہے۔