نیویارک : بالی ووڈ کی معروف ڈانسر اور گلوبل آئیکن نورا فتیحی (Nora Fatehi) ایک بار پھر دنیا کے سب سے بڑے کھیلوں کے میلے “فیفا ورلڈ کپ 2026” (FIFA World Cup 2026) کے اسٹیج پر جلوہ گر ہونے کے لیے تیار ہیں۔
فیفا ورلڈ کپ 2022 میں تاریخ رقم کرنے کے بعد، نورا اب کینیڈا کے شہر ٹورنٹو میں ہونے والی فیفا ورلڈ کپ 2026 کی شاندار افتتاحی تقریب (Opening Ceremony) میں اپنی پرفارمنس کا جادو جگائیں گی۔
نورا فتیحی کے لیے یہ لمحہ انتہائی جذباتی اور خاص ہے کیونکہ ٹورنٹو ان کا اپنا آبائی شہر (Hometown) ہے، جہاں وہ پلی بڑھیں۔ اپنے ہی شہر میں دنیا کے سب سے بڑے اسپورٹس ایونٹ کے عالمی اسٹیج پر بین الاقوامی سامعین کے سامنے پرفارم کرنا ان کے کیریئر کا ایک تاریخی سنگِ میل ثابت ہوگا۔
ذرائع کے مطابق، نورا فتیحی افتتاحی تقریب کے دوران دنیا بھر سے آئے کئی نامور بین الاقوامی فنکاروں اور گلوکاروں کے ساتھ اسٹیج شیئر کریں گی۔
یاد رہے کہ نورا فتیحی نے 2022 کے قطر ورلڈ کپ کے آفیشل اینتھم ‘لائٹ دی اسکائی’ (Light The Sky) میں بھی شاندار پرفارمنس دی تھی اور وہ فیفا ورلڈ کپ کے اسٹیج پر پرفارم کرنے والی پہلی بالی ووڈ شخصیت بنی تھیں۔ اب ایک بار پھر نورا عالمی سطح پر اپنی صلاحیتوں کا لوہا منوانے کے لیے تیار ہیں۔ مداح ان کی اس لائیو پرفارمنس کو دیکھنے کے لیے بے صبری سے انتظار کر رہے ہیں۔