کانپور میں تربیتی طیارہ تباہ، پائلٹ اور انسٹرکٹر ہلاک

کانپور: بھارت کی ریاست اتر پردیش کے شہر کانپور میں ایک افسوسناک حادثے کے دوران گارگ ایوی ایشن کا چار نشستوں پر مشتمل جڑواں انجن والا تربیتی طیارہ گر کر تباہ ہو گیا، جس کے نتیجے میں طیارے میں سوار پائلٹ اور انسٹرکٹر دونوں موقع پر ہی ہلاک ہو گئے۔

پولیس اور ایوی ایشن حکام کے مطابق یہ حادثہ جمعرات کے روز پیش آیا جب طیارے نے صبح 11:30 بجے گارگ ایوی ایشن ٹریننگ سینٹر سے پرواز بھری۔ پرواز کے محض 20 منٹ بعد، واپس آتے ہوئے تقریباً 11:50 بجے دریائے گنگا کے کنارے ایک کھیت کے قریب طیارے کا توازن بگڑ گیا اور وہ زور دار دھماکے سے زمین بوس ہو گیا۔

جاں بحق ہونے والوں میں گجرات سے تعلق رکھنے والے ٹرینی پائلٹ سچن بھاٹیہ اور کرناٹک سے تعلق رکھنے والے فلائنگ انسٹرکٹر ابھیشیک پجاری شامل ہیں۔

حادثے کا شکار ہونے والا طیارہ سال 2023 میں ہی ٹریننگ سینٹر کے فلیٹ میں شامل کیا گیا تھا۔

حادثے کی اطلاع ملتے ہی امدادی ٹیمیں اور پولیس جائے وقوعہ پر پہنچ گئیں۔ تصاویر میں طیارے کو مکمل طور پر تباہ شدہ حالت میں دیکھا جا سکتا ہے جس کا ملبہ دور دور تک بکھرا ہوا ہے۔

مقامی انتظامیہ نے علاقے کو گھیرے میں لے کر شواہد اکٹھے کرنا شروع کر دیے ہیں۔ اگرچہ ابتدائی طور پر حادثے کی وجہ پرواز کے دوران توازن کا بگڑنا بتایا جا رہا ہے، تاہم سول ایوی ایشن حکام کی جانب سے مکمل تحقیقاتی رپورٹ سامنے آنے کے بعد ہی حتمی وجوہات کا تعین ہو سکے گا۔