چار مرتبہ کا عالمی چیمپئن اٹلی ایک بار پھر فیفا ورلڈ کپ تک رسائی حاصل کرنے میں ناکام ہو گیا۔
زینیتسا میں کھیلے گئے پلے آف فائنل میں بوسنیا و ہرزیگووینا نے اٹلی کو سنسنی خیز مقابلے کے بعد پنالٹی شوٹ آؤٹ میں شکست دے دی۔ اس ہار کے ساتھ اٹلی تاریخ کی پہلی سابق عالمی چیمپئن ٹیم بن گیا ہے جو مسلسل تین ورلڈ کپ ٹورنامنٹس کے لیے کوالیفائی نہ کر سکا۔
میچ کے آغاز میں موسیے کین نے اٹلی کو برتری دلائی، تاہم پہلے ہاف کے اختتام سے قبل دفاعی کھلاڑی الیساندرو باستونی کو ریڈ کارڈ دکھا دیا گیا، جس کے باعث اٹلی کو میچ کا بڑا حصہ 10 کھلاڑیوں کے ساتھ کھیلنا پڑا۔
دوسرے ہاف میں بوسنیا نے بھرپور واپسی کی اور متبادل کھلاڑی ہارس تاباکووچ نے 79ویں منٹ میں گول کر کے مقابلہ برابر کر دیا۔
مقررہ وقت اور اضافی وقت میں کوئی فیصلہ نہ ہو سکا، جس کے بعد میچ پنالٹی شوٹ آؤٹ میں چلا گیا جہاں اٹلی کے دو کھلاڑی پنالٹیز پر ناکام رہے جبکہ بوسنیا نے فیصلہ کن کک اسکور کر کے فتح اپنے نام کر لی۔
یہ شکست اٹلی کی حالیہ مایوس کن کارکردگی میں مزید اضافہ ہے، کیونکہ وہ اس سے قبل بھی دو عالمی کپ ٹورنامنٹس کے لیے کوالیفائی نہیں کر سکا تھا۔ 2006 میں عالمی چیمپئن بننے والی ٹیم 2010 اور 2014 کے ورلڈ کپ میں بھی گروپ مرحلے سے آگے نہ بڑھ سکی تھی۔
دوسری جانب بوسنیا و ہرزیگووینا نے 2014 کے بعد دوسری بار فیفا ورلڈ کپ میں جگہ بنا لی ہے، اور ٹیم کی اس کامیابی پر ملک بھر میں جشن کا سماں ہے۔