واشنگٹن: امریکی وفاقی تحقیقاتی ادارے (FBI) کے ڈائریکٹر کاش پٹیل (Kash Patel) نے واشنگٹن میں واقع ایف بی آئی ہیڈ کوارٹرز میں پاکستان کے وفاقی وزیر داخلہ محسن نقوی (Mohsin Naqvi) کی میزبانی کی۔
اس موقع پر انہوں نے دونوں ممالک کے مابین تعاون کو مشترکہ سیکیورٹی چیلنجز سے نمٹنے کے لیے ایک “انتہائی اہم شراکت داری” قرار دیا۔
سوشل میڈیا پلیٹ فارم ایکس (X) پر جاری ایک بیان میں ایف بی آئی ڈائریکٹر کاش پٹیل نے وزیر داخلہ محسن نقوی کا خیرمقدم کرنے کو اپنے لیے اعزاز قرار دیا اور خطے میں امریکی مفادات کے تحفظ کے لیے پاکستان کے مسلسل تعاون اور حمایت کا شکریہ ادا کیا۔ کاش پٹیل کا کہنا تھا:
“ایف بی آئی خطے میں امریکی مفادات کے تحفظ کے لیے پاکستان کے تعاون کو انتہائی قدر کی نگاہ سے دیکھتی ہے۔”
ملاقات کے دوران دونوں رہنماؤں نے دہشت گردی کی مالی معاونت (Counterterrorism Financing) کی تحقیقات اور سائبر کرائم کے سدباب کے لیے باہمی تعاون کو مزید وسعت دینے پر تفصیلی تبادلہ خیال کیا۔ اس کے علاوہ پیشہ ورانہ تربیت کی فراہمی اور وسائل کے تبادلے کو بڑھانے پر بھی اتفاق کیا گیا۔
ڈائریکٹر ایف بی آئی نے مزید کہا”ہم نے اندرون اور بیرون ملک دہشت گردی کی فنڈنگ اور سائبر تحقیقات سے نمٹنے کے لیے وسائل اور خصوصی تربیت کی فراہمی سے متعلق اہم بات چیت کی ہے۔ ہماری یہ شراکت داری انتہائی اہمیت کی حامل ہے اور ہم مستقبل میں مزید کامیابیوں کے منتظر ہیں۔”
واضح رہے کہ وزیر داخلہ محسن نقوی گزشتہ ہفتے واشنگٹن پہنچے تھے۔ اس سے قبل انہوں نے نیویارک میں اقوام متحدہ کے پولیس چیفس کے پانچویں سربراہی اجلاس (UNCOPS) میں پاکستان کی نمائندگی کی، جہاں انہوں نے اجلاس کی سائیڈ لائنز پر متعدد علاقائی اور بین الاقوامی اعلیٰ حکام سے ملاقاتیں بھی کیں۔
یہ دونوں اعلیٰ حکام کے مابین پہلی ملاقات نہیں ہے۔ اس سے قبل ستمبر 2025 میں بھی محسن نقوی نے واشنگٹن میں کاش پٹیل سے ملاقات کی تھی جسے انہوں نے “شاندار” قرار دیا تھا۔ اس وقت دونوں رہنماؤں نے غیر قانونی تارکین وطن، دہشت گردی کے خاتمے اور پولیس افسران کے تبادلے کے پروگراموں پر تعاون بڑھانے پر تبادلہ خیال کیا تھا۔