لاس اینجلس (ویب ڈیسک): اکیڈمی آف موشن پکچر آرٹس اینڈ سائنسز (AMPAS) نے 98ویں سالانہ آسکر ایوارڈز کے لیے ووٹنگ کے طریقہ کار میں ایک انقلابی تبدیلی متعارف کروا دی ہے۔ اب کسی بھی کیٹیگری میں ووٹ ڈالنے کے لیے ووٹرز پر اس کیٹیگری کی تمام نامزد فلمیں دیکھنا لازمی قرار دے دیا گیا ہے۔
اپریل 2025 میں اعلان کردہ اس قانون کے تحت، جو اب 15 مارچ 2026 کو ہونے والی تقریب کے لیے نافذ العمل ہے، اکیڈمی کے ارکان صرف اسی صورت میں حتمی ووٹ ڈال سکیں گے جب وہ متعلقہ کیٹیگری کی تمام فلمیں دیکھ چکے ہوں گے۔ مثال کے طور پر، اگر کوئی رکن ‘بہترین لباس’ (Best Costume Design) کے لیے ووٹ ڈالنا چاہتا ہے، تو اسے اس کیٹیگری میں نامزد تمام پانچوں فلمیں بشمول “Avatar: Fire and Ash” اور “Frankenstein” دیکھنا ہوں گی۔
اکیڈمی اس شرط کی نگرانی اپنے ڈیجیٹل اسٹریمنگ پلیٹ فارم ‘اکیڈمی اسکریننگ روم’ کے ذریعے کرے گی، جو اس بات کی تصدیق کرے گا کہ ووٹر نے فلم دیکھی ہے یا نہیں۔ اگر کسی رکن نے فلم سینما یا کسی فیسٹیول میں دیکھی ہے، تو اسے “Seen Elsewhere” فارم جمع کرانا ہوگا۔
رپورٹس کے مطابق، یہ فیصلہ ان خدشات کے پیشِ نظر کیا گیا کہ کئی ووٹرز فلم دیکھے بغیر صرف ریویوز یا دوسروں کی پسندیدگی کی بنیاد پر ووٹ ڈال دیتے تھے۔ گزشتہ سالوں میں کئی فلم سازوں نے اعتراف کیا تھا کہ انہوں نے تمام نامزد فلمیں دیکھے بغیر ہی اپنے بیلٹ پیپرز جمع کرائے تھے۔
98ویں اکیڈمی ایوارڈز کی تقریب اتوار، 15 مارچ 2026 کو منعقد ہوگی، جبکہ ووٹنگ کا عمل 5 مارچ تک مکمل کر لیا جائے گا۔ اکیڈمی کے ارکان نے اس فیصلے کو خوش آئند قرار دیا ہے تاکہ ایوارڈز کی شفافیت کو برقرار رکھا جا سکے۔
