New York City پولیس میں چھ مزید پاکستانی نژاد امریکی افسران کی ترقی نے نہ صرف مقامی کمیونٹی بلکہ پاکستان کا سر بھی فخر سے بلند کر دیا ہے۔ New York Police Department (NYPD) میں خدمات انجام دینے والے ان افسران کو اعلیٰ عہدوں پر ترقی دی گئی ہے، جسے ایک بڑی قومی کامیابی قرار دیا جا رہا ہے۔
ترقی پانے والے پاکستانی افسران میں لیفٹیننٹ ارسلان سلیمان، لیفٹیننٹ جواد جاوید، لیفٹیننٹ محسن جاوید، ڈیٹیکٹو کائنات اسلم، سارجنٹ محمد شان اور سارجنٹ صغیر احمد شامل ہیں۔ ان افسران کی پیشہ ورانہ صلاحیتوں اور شاندار کارکردگی کو سراہتے ہوئے انہیں اہم ذمہ داریاں سونپی گئی ہیں۔
خصوصی طور پر سارجنٹ محمد شان نے صرف پانچ ماہ کے مختصر عرصے میں دو مرتبہ ترقی حاصل کر کے غیر معمولی قابلیت کا مظاہرہ کیا، جبکہ سارجنٹ صغیر احمد کو بھی ایک سال کے اندر دو بار پروموشن ملنا ان کی بہادری اور فرض شناسی کا واضح ثبوت ہے۔
ارسلان سلیمان، محسن جاوید اور جواد جاوید اب لیفٹیننٹ کے عہدے پر اپنے فرائض انجام دیں گے، جبکہ کائنات اسلم کی بطور ڈیٹیکٹو ترقی نے خواتین کے لیے بھی ایک روشن مثال قائم کی ہے اور یہ پاکستان کے لیے ایک اہم سنگِ میل سمجھا جا رہا ہے۔
اس خوشی کے موقع پر پاکستانی امریکن لاء انفورسمنٹ سوسائٹی کے روحیل خالد سمیت پوری کمیونٹی نے تمام ترقی پانے والے افسران کو دل کی اتھاہ گہرائیوں سے مبارکباد پیش کی اور اسے پاکستان اور اوورسیز پاکستانیوں کی اجتماعی کامیابی قرار دیا۔
