نیویارک (ویب ڈیسک): نیویارک اور نیو جرسی میں حالیہ شدید برف باری کے بعد اب موسم کا مزاج بدلنے والا ہے۔ ماہرینِ موسمیات کے مطابق مارچ کے دوسرے ہفتے سے مشرقی امریکہ میں ہائی پریشر کا ایک بڑا “رج” (Ridge) بن رہا ہے جو سردی کی لہر کو ختم کر کے گرمی لائے گا۔
موسمیاتی ماڈلز کے مطابق آئندہ ہفتے کے دوسرے نصف حصے میں گرمی بڑھنے سے حالیہ برفانی طوفان کی بچی کھچی تمام برف پگھلنے کا امکان ہے۔
NOAA کے کلائمیٹ پریڈیشن سینٹر کے مطابق 6 سے 12 مارچ کے درمیان نیویارک میں معمول سے زیادہ درجہ حرارت رہنے کا 88 فیصد امکان ہے۔
امکان ہے کہ اگلے ویک اینڈ تک درجہ حرارت 60 ڈگری فارن ہائیٹ (تقریباً 15-16 ڈگری سیلسیئس) تک پہنچ سکتا ہے۔
اگرچہ درجہ حرارت میں اضافہ مارچ کے وسط تک جاری رہنے کی توقع ہے، تاہم کیلنڈر کے مطابق موسمِ بہار کا باقاعدہ آغاز 20 مارچ سے ہوگا۔ ماہرین کا کہنا ہے کہ مارچ کا تیسرا ہفتہ بھی معمول سے زیادہ گرم رہ سکتا ہے، جو طویل سردی کے ستائے ہوئے شہریوں کے لیے ایک بڑی راحت ثابت ہوگا۔
